Сталі вядомыя падрабязнасці катастрофы расейскага знішчальніка ў Сірыі

Папярэдняй прычынай катастрофы расейскія вайскоўцы назвалі трапленне птушкі ў рухавік.

Адразу пасля ўзлёту ў знішчальніка Су-30СМ, які пацярпеў катастрофу ў Сірыі раней у чацвер, 3 траўня, адбылося рэзкае падзенне цягі ў адным з рухавікоў, піша «Коммерсантъ» са спасылкай на крыніцу.

Паводле звестак «Коммерсанта», самалёт павінен быў здзейсніць патрульны аблёт акваторыі Міжземнага мора. Для падстрахоўкі на борце знаходзіўся поўны боекамплект.

Маёр Альберт Давідзяна - камандзір самалёта - ужо ўдзельнічаў у такіх аперацыях. Знішчальнік прайшоў падрыхтоўку, ніякіх нараканняў да яго, са слоў спецыялістаў, не ўзнікала.

Нягледзячы на гэта, праблемы ў экіпажа пачаліся адразу пасля таго, як Су-30СМ падняўся ў паветра. Замест таго, каб набіраць хуткасць, знішчальнік пачаў дзяўбці носам, распавялі відавочцы.

Крыніца ў органах вайсковага кіравання адзначыла, што адразу пасля ўзлёту з нейкай прычыны адбылося рэзкае падзенне цягі ў адным з рухавікоў. Са слоў экспертаў, сябры экіпажа ў такой сітуацыі маглі паспець катапультавацца, але наважылі паспрабаваць выраўняць знішчальнік. Калі самалёт пачаў паварочвацца, каб паляцець назад, ён заваліўся на левы бок і абрынуўся ў мора. Ад удару ў Су-30см цалкам адарвала левае крыло і хваставое апярэнне.

Крыніца выдання дадала, што з тэхнічнага пункту гледжання катастрофу Су-30СМ нельга назваць крытычнай стратай. У Хмейміме ў розны час знаходзілася ад чатырох да шасці знішчальнікаў такога тыпу. Замест самалёта, які разбіўся ў Сірыю могуць накіраваць іншы аналагічны.

Расейскі знішчальнік разбіўся ў Сірыі раней у чацвер, 3 траўня. Абодва лётчыкі загінулі. Паводле звестак ведамства, знішчальнік не быў збіты. Магчымай прычынай аварыі там назвалі трапленне птушкі ў рухавік.