Відэафакт: У Гомелі газонакасільшчык трымерам косіць пясок і недапалкі
10- 13.06.2018, 12:39
- 18,734
Жыхары горада рыхтуюцца да прыезду «мэра».
Сёння а 8-й гадзіне раніцы жыхары Навабеліцы, якія не спяшаліся на працу, былі патрывожаныя шумам працы трымерыста. Аднак убачыўшы, чым займаецца працоўны, многія былі ўражаныя, пішуць «Моцныя навіны».
З стараннасцю, вартай значна лепшага выкарыстання, мужчына выкошваў... зусім пустую глебу. «Косіць пясок і недапалкі», – так апісалі ўбачанае жыхары вуліцы Ілліча ў раёне прыпынку «Завод хімвырабаў».
На лагічнае пытанне «Ты што, ачмурэў?» трымерыст не менш лагічна і зусім спакойна адказаў: «Кажуць, “мэр” тут будзе ехаць, сказалі выкасіць усё». І вярнуўся да свайго занятку.
А дзявятай раніцы жыхары паведамілі, што для лепшага выніку выкас няіснай травы быў паўтораны. «Пайшоў на другое кола», – паведамілі мясцовыя жыхары.