Навукоўцы: Усмешка робіць чалавека больш запамінальным

Людзі значна лепш запамінаюць фатаграфіі незнаёмцаў, калі тыя ўсміхаюцца.

Пра гэта заяўляюць брытанскія навукоўцы ў артыкуле, апублікаваным у часопісе British Journal of Psychology, паведамляе ria.ru.

«Пазнаванне твару чалавека па фатаграфіі выконвае важную ролю ў нашым жыцці, аднак мы ведаем, што наш мозг вельмі дрэнна спраўляецца з гэтай задачай. Падробка дакументаў і выкарыстанне чужых асабістых звестак - велізарная шматузроўневая праблема сёння, і таму нам вельмі важна знайсці новыя метады распазнавання твараў», - распавядае Міла Мілева з Ёркскага ўніверсітэта (Вялікабрытанія).

Знешнасць чалавека выконвае вялікую ролю ў тым, як развіваецца яго жыццё, прычым яна ўплывае не толькі на асабістае жыццё, але і на кар'еру і становішча ў грамадстве агулам. Да прыкладу, у 2011 і 2013 гадах дзве групы брытанскіх навукоўцаў выявілі, што прыгожыя людзі ў сярэднім валодаюць больш высокім IQ і часцей уладкоўваюцца на больш перспектыўную працу, чым людзі з пасрэднай або непрывабнай знешнасцю.

Такая залежнасць існуе як сярод мужчын, так і сярод жанчын, і прымушае многіх людзей, асабліва прадстаўніц слабага полу, мяняць знешнасць пры дапамозе пластычных аперацый, або мяняць манеру сваіх паводзін, у тым ліку і тое, як яны ўсміхаюцца. Да прыкладу, многія людзі лічаць, што падкрэслена яркая ўсмешка ад вушэй да вушэй выклікае прыхільнасць суразмоўцы больш, чым звычайны выраз твару чалавека.

Мілева і яе калегі па ўніверсітэце знайшлі яшчэ адну цікавую ўласцівасць усмешак, спрабуючы раскрыць фактары, якія перашкаджаюць чалавеку пазнаваць аднаго і таго ж чалавека на фотаздымках, зробленых пры розным асвятленні ці ў рознай абстаноўцы, а таксама знаходзіць сляды іх кампутарнай апрацоўкі.

Вывучаючы гэтую праблему, брытанскія навукоўцы звярнулі ўвагу на тое, што паводле стандартаў большасці краін свету, усе фатаграфіі на дакументах, фотаробатах і іншых «афіцыйных» паперах маюць адну агульную рысу - на іх людзі маюць нейтральны, незапамінальны выраз твару.

Гэта прымусіла іх праверыць, як розныя эмоцыі, у тым ліку ўсмешкі, уплываюць на тое, наколькі добра мы запамінаем незнаёмцаў і распазнаем іх фатаграфіі пасля. Для гэтага даследчыкі сабралі дзве каманды з 34 і 40 студэнтаў, і папрасілі іх супаставіць два наборы фатаграфій незнаёмых ім людзей. Першы ўтрымліваў у сабе толькі «сур'ёзныя» партрэты, а ў другі тыя ж самыя людзі ўсміхаліся ці праяўлялі нейкія іншыя эмоцыі.

Першыя ж назіранні паказалі, што ўсмешкі значна павышаюць пазнавальнасць чалавека. У сярэднім, студэнты з другой групы на 9% часцей вызначалі, што на фотаздымках выяўленыя адны і тыя ж людзі, і на 7% лепш знаходзілі адрозненні паміж карткамі падобных, але розных людзей.

Што цікава, калі навукоўцы вырашылі «падрабіць» партрэты і дадалі ўсмешкі на некалькі фотаздымкаў «сур'ёзных» або сумных твараў, студэнты пачалі значна горш спраўляцца з гэтай задачай.

Усё гэта, як лічыць Мілева, кажа пра тое, што правілы падрыхтоўкі фатаграфій для пашпартоў і іншых дакументаў варта памяняць - калі людзі будуць усміхацца на гэтых здымках, то іх будзе значна прасцей запамінаць і лягчэй знаходзіць сляды падробкі іх папер.