У Гомелі на дрэве заўважылі рысь

З жывёлай сутыкнуўся мясцовы рыбак.

Трывожнае паведамленне з'явілася ў гомельскай супольнасці аматараў жывёл: сёння ў адным з гарадскіх раёнаў бачылі рысь - яна сядзела на дрэве і паядала сабаку. Відавочца, мясцовы рыбак, патэлефанаваў у МНС, але да прыезду ратавальнікаў драпежніка на месцы ўжо не было. Цяпер зааабаронцы заклікаюць усіх быць асцярожнымі ў гэтай мясцовасці, а лепш наогул устрымацца ад прагулак там. Скептыкі, зрэшты, у рысь не вераць.

«У 5-м мікрараёне, недалёка ад пляцоўкі для выгулу сабак, была заўважаная рысь!!! - папярэджваюць адміністратары суполкі са спасылкай на рыбака, які праходзіў побач. - Яна сядзела на дрэве і ела сабаку».

Гаворка ідзе пра ўскраіну Гомеля, у некалькіх хвілінах хады адсюль знаходзяцца новабудоўлі і ажыўленыя кварталы, за ракой - палі і не надта густыя лясы.

У Гомельскай аблуправе МНС пацвердзілі: сапраўды, учора ўдзень паступіла паведамленне аб тым, што рысь бачылі побач са сцежкай, якая вядзе да возера. Адправіліся на месца, але ні саму жывёлу, ні рэшткі яе абеду, ні іншыя сляды барацьбы не знайшлі.

Рысь, якая выйшла на паляванне ў гарадской мяжы, - не надта частая з'ява нават для Гомеля. Скептыкі ў каментарах неадкладна выказалі здагадку, што гэта магла быць вавёрачка.

Журналісты onliner.by звязаліся з тым самым рыбаком. Сцяпан распавядае, як была справа:

- У нядзелю прыкладна а 10:45 я ішоў па сцежцы ад возера, там буралом такі... Пачуў зверху гучнае рыканне, падняў галаву - сядзіць побач на дрэве, метрах у пяці ад зямлі. І быццам нешта есць - можа, сабаку якую, а можа, і бабра, яны тут таксама водзяцца. Яна мяне ўбачыла, зарыкала. Я прайшоў - перастала рыкаць. На выгляд яна ўтрая буйнейшая за майго Стафа, то бок, кілаграмаў 50, думаю. Хоць, не выключаю, што ў страху вочы вялікія... Я асабліва не разглядаў яе, пайшоў сабе, страшна было. З дома ўжо патэлефанаваў у МНС, схадзіў, паказаў месца. Але нічога не знайшлі. Ды там кусты, толкам нічога не відаць...