У Арменіі створаная спецыяльная антыкарупцыйная служба

Новыя ўлады Арменіі абвясцілі вайну карупцыі.

Для гэтага быў заснаваны спецыяльны антыкарупцыйны орган - Служба дзяржаўнага кантролю Арменіі. Узначаліў яе рэвалюцыйны паплечнік сённяшняга прэм'ер-міністра Арменіі Нікола Пашыняна Давід Санасаран, паведамляе "Еўрарадыё".

Служба існуе толькі тыдзень. Сансаран прызнаецца, што штат установы яшчэ да канца не сфармаваны.

"З самага пачатку я заявіў, што не будзе мець абсалютна ніякага значэння, кім з'яўляюцца карупцыянеры. Ці будуць яны сябрамі, сваякамі або сябрамі з рэвалюцыі - гэта не важна. Нават калі гэта будзе нехта з маіх сямейнікаў.

Хоць гэта будзе і немагчыма, бо ніхто з маіх сямейнікаў падчас маёй службы не будзе займаць ніякіх пасад ва ўрадзе. А тыя людзі, якія бралі ўдзел у рэвалюцыі, нясуць падвойную адказнасць і будуць удвая больш кантралявацца нашай службай. І тыя асобы, якія будуць парушаць закон, незалежна ад таго, як блізка яны стаяць да прэм'ер-міністра, да мяне, патрапяць пад вельмі строгі пераслед», - кажа Давід Санасаран.

Служба дзяржаўнага кантролю Арменіі будзе збіраць факты карупцыйнай дзейнасці. Даклады аб іх будуць класціся на стол прэм'еру Міколу Пашиняну. Той, у сваю чаргу, будзе прымаць пастанову: даваць фактах ход і распачынаць крымінальную справу або не.

- А калі прэм'ер наважыць не пачынаць справу - якія будуць вашы дзеянні?

- Не думаю, што такое магчыма. Мы маем дакладныя дамоўленасці з прэм'ер-міністрам на гэты конт. Але калі нават уявіць, што такое здарыцца, я буду прымаць асабовыя пастановы. Праўда, я не магу наўпрост, у абыход прэм'ера звяртацца з сабранымі матэрыяламі ў праваахоўныя органы - гэта патрабаванне закона.

Праўда, Давід Санасаран зможа апублікаваць сабраныя факты пра карупцыянера ў СМІ.

Падчас размовы заўважаю, што ў сцяне кабінета старшыні Службы дзяржаўнага кантролю ў месцы, дзе зазвычай чыноўнікі вешаюць партрэт кіраўніка краіны, цвік ёсць, але на ім нічога не вісіць. У адказ Давід Санасаран усміхаецца:

"Для народа гэта, мабыць, будзе сюрпрызам, але ва ўсім будынку нашай службы будуць вывешаныя фатаграфіі звычайных удзельнікаў рэвалюцыйнага руху. Чыноўнікі маюць ведаць, што грамадзяне краіны заўсёды сочаць за імі, бо менавіта яны прызначылі чыноўнікаў для таго, каб яны служылі народу. А на гэты цвік павешу фота якой-небудзь бабулі або дзядулі, альбо дзіцяці - удзельнікаў рэвалюцыйнага руху, якіх я асабіста не знаю", - прызнаецца Санасаран.

І з усмешкай дадае: ён і ягоная служба зробяць усё, каб чыноўнікі яшчэ лепш памяталі, што служыць яны павінны народу, а не сабе.