Каровам на ферме ў Капцёўцы падключылі больш якасную ваду, чым людзям
2- 21.07.2018, 18:49
- 9,888
Як жывуць беларускія аграгарадкі.
Жыхары аграгарадка Капцёўка ў Гарадзенскім раёне цягам двух месяцаў вымушаныя піць іржавую і смярдзючую ваду, піша сайт тэлеканала «Белсат».
Як апавядаюць жыхары Капцёўкі, ужо два месяцы з кранаў цячэ ржавая, алейная i смярдзючая вада.
Пасля таго як сапсавалася помпа ў воданапорнай вежы, памяняць якую не было грошай, людзям падключылі іншую воданапорную вежу. Многа гадоў яна была закансерваваная. За час невыкарыстання, у вежы, відаць, з'явілася ржа, якая сёння і трапляе ў краны жыхароў.
Каровам на мясцовай ферме пры гэтым падключылі добрую ваду з іншай воданапорнай вежы, што моцна пакрыўдзіла жыхароў аграгарадка.
Некаторыя набываюць ваду ў краме
«Вось, глядзіце! Толькі ўчора ванну пачысціла – і ўжо рыжая. Усе кубкі брудныя. Мала таго, вада такая тлустая. Яна проста смярдзіць. Калі такая вада пайшла, я адразу не падумала і ўзвар паставіла з вішняў. Не ведаю, што будзе, але пакуль слоікі стаяць. Але як іх потым піць? Ваду ў кубак наліем, нават да рота не даносім, смурод ідзе. Гарбату ці суп зварыць, – даводзіцца ўсё з калодзежа браць. Добра, што ў нас суседзі ёсць з калодзежам, а некаторыя павінны набываць ваду ў краме», – кажа Лілія Эдвардаўна, жыхарка Капцёўкі.
Як апавядае жанчына, разам з мужам іх ратуюць суседзі, якія дазваляюць браць ваду ў калодзежы. Аднак у Капцёўцы жыве блізу тысячы чалавек, а калодзежаў толькі некалькі.
«Удзень больш за 20 чалавек прыходзіць. Гэтая ўся вуліца і тая яшчэ», – паказвае рукой гаспадыня студні.
«Муж за сёння ўжо два разы хадзіў па ваду. Гэта мы яшчэ на пенсіі. А нашы суседзі? У іх дзеткі маленькія, то казалі, што пачало высыпаць», – кажа спадарыня Лілія.
Мокрая кропка
Біць трывогу ў аграгарадку пачаў былы галоўны эканаміст мясцовага калгаса, які сёння на пенсіі. Спадар Віктар доўгі час дамагаўся правядзення экспертызы ад Гарадзенскага занальнага цэнтра гігіены і эпідэміялогіі.
«Сто разоў ім тэлефанаваў, пакуль вынікі аналізу аддалі. Высветлілася, што ў восем разоў перавышаны ўзровень жалеза. А мутнасць дык увогуле. Вада такая рыжая і брудная», – кажа спадар Віктар.
Праз адсутнасць добрай вады пакутуе ўся Капцёўка, у якой ёсць школа і дзіцячы сад. Як скардзяцца мясцовыя супрацоўнікі, дзеці адмаўляюцца піць і есці з посуду, які вымыты ржавай вадой.
Два дні таму мясцовыя жыхары сустракаліся з прадстаўнікамі Гарадзенскага аблвыканкама, якія паабяцалі разабрацца як мага хутчэй і памяняць помпу.
«Але ці зрушыцца гэтая справа з мёртвай кропкі, не ведаем», – кажа жыхарка Капцёўкі.
«Мёртвая? Гэта мокрая кропка!» – удакладняе жартам спадар Станіслаў.