ЦРУ: Пекін вядзе супраць Вашынгтона халодную вайну

КНР узмацняе ўплыў ва ўсім свеце, каб зрушыць ЗША з месца звышдзяржавы-лідара.

Кітай вядзе халодную вайну супраць ЗША, мяркуе намеснік памочніка кіраўніка аддзела ЦРУ ва Усходняй Азіі Майкл Колінз. На штогадовым мерапрыемстве Aspen Security Forum у Аспен (штат Каларада) Колінз заявіў, што КНР узмацняе ўплыў ва ўсім свеце, каб зрушыць ЗША з месца звышдзяржавы-лідара, паведамляе тэлеканал CNN у суботу, 21 ліпеня, піша "Нямецкая хваля".

"Мяркуючы з іх уласных выразаў ды з таго, што кажа Сі (Сі Цзіньпін – старшыня КНР. – рэд.), я сцвярджаў бы, у сутнасці, што тое, што яны вядуць супраць нас, гэта, у вялікім рахунку, халодная вайна", – заявіў супрацоўнік ЦРУ, патлумачыўшы, што гаворка ідзе не пра стасункі, у якіх раней знаходзіліся СССР і ЗША, а пра "халодную вайну ў сутнасці гэтага вызначэння".

Халодная вайна мае на ўвазе выкарыстанне ўсіх магчымых сродкаў – законных і незаконных, дзяржаўных і прыватных, эканамічных і вайсковых – для таго, каб падарваць становішча краіны-спаборніка, не ўступаючы пры гэтым у канфлікт, указаў Колінз, патлумачыўшы, што "кітайцы не хочуць канфлікту". На ягоную думку, Пекін "хоча, каб усе іншыя краіны, прымаючы пастановы ў палітычных пытаннях, займалі бок Кітая, а не ЗША, бо кітайцы ўсё больш разглядаюць канфлікт з ЗША і нашымі каштоўнасцямі як канфлікт сістэмаў".