У Нямеччыне прэзідэнта РФ сустракалі лозунгамі «Пуцін - забойца!»

Прэзідэнта РФ сустракалі тры групы дэманстрантаў.

Уладзімір Пуцін не быў у Бэрліне з кастрычніка 2016 года, а да таго не наведваў Нямеччыну больш за два гады, нагадвае «Радио Свобода».

Такім чынам, з пачатку ўзброенага канфлікту на ўсходзе Украіны гэта яго другі візіт у сталіцу Нямеччыны. Раней ён бываў тут значна часцей. А сустрэча з Мэркель у Нямеччыне адзін на адзін - першая за некалькі гадоў. У загараднай урадавай рэзідэнцыі, у замку Мезенбург, у парку якога Мэркель шпацыравала з Дзмітрыем Мядзведзевым і верыла тады, што ён пойдзе на другі тэрмін (расчараванне яе пасля «ракіроўкі» было вялікае), расейскага лідара сустракалі тры групы дэманстрантаў: 150 сірыйцаў, якія жывуць у Бэрліне і якія пратэстуюць супраць дзеянняў Расеі ў іх краіне, прыкладна столькі ж запуцінцаў і некалькі дзясяткаў сябраў узначаленага Ігарам Эйдманам Форуму Расейскамоўных еўрапейцаў, незадаволеных замежнай і ўнутранай палітыкай Расеі, і якія патрабуюць вызвалення Алега Сянцова.

На сайце Форуму быў апублікаваны заклік Ігара Эйдмана: "Дарагія бэрлінцы і жыхары бліжэйшых гарадоў, да нас прыехаў, да нас прыехаў... Валодзя Пуцін "дарагі "(дорага каштуе ягонае кіраванне, гекатомбы ахвяр). Давайце сустрэнем міжнароднага злачынцу так, як ён таго заслугоўвае".

Мэркель прыляцела на гелікаптэры. Пуцін на аўтамабілі праехаў паўз дэманстрантаў. Як паведаміў Ігар Эйдман, ягонай групе ўдалося пракрычаць некалькі лозунгаў, у сярод іх, "Пуцін - забойца!".