Сенатар Макейн адмовіўся ад далейшай тэрапіі

Як паведаміла сям'я амерыканскага палітыка, ён прыняў пастанову спыніць лячэнне з уласцівай яму сілай волі.

81-гадовы амерыканскі сенатар Джон Макейн, які пакутуе ад раку мозгу, наважыў адмовіцца ад далейшага лячэння. Паведамленне пра гэта сям'я палітыка размясціла ў пятніцу, 24 жніўня, на сайце сенатара, піша «Немецкая волна». «Прагрэс захворвання і няўмольнае старэнне выносяць свой вердыкт. З яго звычайнай сілай волі ён наважыў спыніць лячэнне», - гаворыцца ў заяве.

Сямейнікі нагадалі, што Макейн, які больш за 30 гадоў прадстаўляе ў Сенаце штат Арызона, мінулым летам паведаміў амерыканскаму народу пра сваё захворванне - агрэсіўная гліабластома галаўнога мозгу - і несуцяшальныя прагнозы. «З тых часоў Джон перасягнуў усе чаканні, звязаныя з яго выжываннем», - адзначаецца ў паведамленні.

Сенатар Макейн з'яўляецца непрымірымым крытыкам расейскага кіраўніцтва і прэзідэнта Пуціна. Акрамя таго, ён актыўны прыхільнік цяперашняй улады ва Украіне і наведваў Кіеў у часы Майдана. Абаронны бюджэт ЗША на 2019 г, у якім закладзены 250 млн даляраў на вайсковую дапамогу Украіне, а таксама запланаваныя сродкі на супрацьдзеянне «расейскай агрэсіі», у Кангрэсе ЗША атрымаў назву «закона Макейна».