Жыхары Гомеля ўзбунтаваліся супраць эксперыменту ЖКГ

Жыхары шматпавярховіка адмовіліся пераўсталёўваць электралічыльнікі за свой кошт.

Пратэст жыхароў вуліцы Цімафеенкі ў Гомелі супраць пераўсталявання электралічыльнікаў за свой кошт прынёс станоўчыя вынікі, піша gomel.today.

Раней СМІ паведамлялі пра пратэст жыхароў дома № 22 на вул.Цімафеенкі ў раёне «старога аэрадрома», якія запатрабавалі ад камунальнікаў спыніць «эксперымент» у замене электралічыльнікаў на электронныя за кошт сродкаў грамадзянаў.

Тады, праз месяц пасля калектыўнага звароту ў КЖРЭУП «Чыгуначнае» і ўжо на 2-і дзень пасля абскарджання атрыманага адказу ў разнастайных вышэйшых інстанцыях, камунальнікі адступілі ад сваіх першапачатковых патрабаванняў у доме № 24 на вуліцы Кожара, які быў таксама паказаны ў скарзе. У тэрміновым парадку тут за адзін дзень (нават без папярэдняй замены старых электрашчытавых на лесвічных пляцоўках) гомельскі «Энэргазбыт» усталяваў электралічыльнікі бясплатна.

Тым часам у доме № 22 на вуліцы Цімафеенкі камунальнікі адмовіліся ад рэалізацыі сваіх пагрозаў у выглядзе санкцый – бытавым абанентам у канцы чэрвеня тут не сталі падвышаць тарыф на аплату за электраэнэргію да 100% ад эканамічна абгрунтаванага, як гэта было абяцана зрабіць у дачыненні да ўсіх, хто адмовіцца падпісаць новую дамову з камунальнікамі і заплаціць 117.77 BYN за пераўсталяванне існых індукцыйных электралічыльнікаў на электронныя.

І вось цяпер – заяўнікі з вуліцы Цімафеенкі дамагліся поўнага вяртання знятых кантрольных пломбаў з электралічыльнікаў на свае месцы для пераводу звестак прыбораў з «безуліковага» зноў у рэжым «камерцыйнага ўліку» спажыванай электраэнэргіі.

Супрацоўнікі гомельскага «Энэргазбыту» вярнулі назад на ўсе існыя індукцыйныя электралічыльнікі бытавых абанентаў у гэтым доме свае кантрольныя пломбы, якія былі знятыя імі ж яшчэ ў сярэдзіне сакавіка 2018 года паводле спецыяльнага запыту з КЖРЭУП «Чыгуначнае».

Пры гэтым на зададзеныя жыхарамі пытанні ад электрыкаў быў атрыманы адказ пра тое, што ўстаноўка электронных электралічыльнікаў у доме № 22 на вуліцы Цімафеенкі надалей будзе праведзеная планава і бясплатна – у поўнай адпаведнасці з патрабаваннямі рэалізаванай дзяржаўнай праграмы ў стварэнні ў краіне да 2023 аўтаматызаванай сістэмы кантролю і ўліку электрычнай энэргіі, АСКУЭ.

Адзін з актыўных удзельнікаў калектыўнага звароту, пенсіянер Чыгрынец, які ў сілу настойлівасці камунальнікаў і адпісак з высокіх інстанцый на ягоныя ўласныя звароты таксама мусіў падпісаць дамову з КЖРЭУП «Чыгуначнае» на аплату пераўсталявання электралічыльнікаў, у сувязі з вяртаннем пломбаў на месца тлумачыць:

– Аляксею Лапіцкаму вялікі дзякуй. Хоць з цяжкасцю ў гэта ўжо верылася, але ўсё атрымалася. Малайчына. Я асабіста размаўляў з супрацоўнікамі «Гомельэнэрга», якія вярталі пломбы на месца. Яны пацвердзілі, што ўстаноўка новых прыбораў нам будзе праведзеная ў перыяд да 2023 бясплатна. Так што для нас, пенсіянераў, знікла яшчэ адна праблема і зусім неабгрунтаваны пункт выдаткаў.

Такім чынам, можна канстатаваць, што жыхары яшчэ аднаго дома на «Старым аэрадроме» здолелі адстояць свае правы і законныя інтарэсы і не ўдзельнічаць у сумнеўным «эксперыменце» камунальнікаў.

Кантрольныя пломбы на дзейныя прыборы камерцыйнага ўліку электраэнэргіі людзям вярнулі назад. І ніякіх стоадсоткавых тарыфаў на спажываную электраэнэргію за гэты так званы «безуліковы перыяд», не ўводзілі.