У аэрапорце Менск цяпер можна забраніраваць месца на платнай стаянцы

Але каштуе гэта 10 рублёў.

Нацыянальны аэрапорт Менск уводзіць новую платную паслугу «Браніраванне парковачных месцаў на тэрыторыі платнай аўтастаянкі на 1235 месцаў». Адпаведная інфармацыя з'явілася на сайце Нацыянальнага аэрапорта, паведамляе «Онлайнер».

Тым, хто збіраецца забраніраваць месца на паркоўцы загадзя, трэба ўлічваць, што паслуга гэтая платная, каштуе 10 рублёў.

«Кошт паслугі абумоўлены прыярытэтным размяшчэннем зоны браніравання на аўтастаянцы. Скарыстаўшыся паслугай браніравання, кіроўца атрымлівае магчымасць пакінуць свой аўтамабіль на захоўванне ў непасрэднай блізкасці ад аэравакзальнага комплексу», - растлумачылі ў Нацыянальным аэрапорце.

Як гэта працуе

Крок першы: бяром тэлефон і тэлефануем

Для таго каб забраніраваць месца на стаянцы ў аэрапорце, трэба выканаць пэўныя патрабаванні. Між іншым, не раней чым за 48 гадзін і не пазней чым за 24 гадзіны да планаванага моманту прыбыцця ў аэрапорт патэлефанаваць адміністратару аўтамабільных стаянак па тэлефоне +375 (17) 279-18-80 або +375 (33) 300-10-19. Адміністратару трэба будзе падаць звесткі, неабходныя для афармлення паслугі браніравання:

Меркаваныя дата і час (перыяд) заканчэння браніравання;

Прозвішча, імя, імя па бацьку кіроўцы транспартнага сродку;

марку і дзяржаўны рэгістрацыйны знак транспартнага сродку;

кантактны нумар тэлефона кіроўцы.

Пасля гэтага адміністратар раскажа пра парадак дзеянняў па прыездзе ў аэрапорт.

Важна

Бронь паркавальнага месца пачынае дзейнічаць за 2 гадзіны да пачатку перыяду бранавання і здымаецца па заканчэнні 2 гадзін з моманту пачатку перыяду браніравання.

Крок другі: прыязджаем у аэрапорт

Трэба пад'ехаць да пункта ўезду на платную ахоўную стаянку (паласа ўезду №3). Затым прыйдзецца зноў патэлефанаваць па тэлефоне + 375 (33) 300-10-19 або звярнуцца ў павільён пункта ўезду на тэрыторыю стаянкі і паведаміць пра прыбыццё. А пасля гэтага можна будзе прайсці ў павільён пункта ўезду на стаянку, дзе спатрэбіцца падаць адміністратару звесткі па аформленай паслузе браніравання. Адміністратар выдасць электронную картку-пропуск, неабходную для ўезду на тэрыторыю стаянкі і выезду з яе.

Гэтую картку трэба будзе прыкласці да счытвальніка аўтаматызаванай стойкі пункта ўезду на стаянку. Шлагбаум падымецца - можна накіроўвацца да пункта ўезду на тэрыторыю зоны браніравання. Там картку давядзецца яшчэ раз прыкладваць да счытвальніка, а ўжо затым стане магчымым прайсці да любога свабоднага месца на тэрыторыі зоны браніравання.

Важна

У аэрапорце папярэдзілі, што кіроўца нясе адказнасць за правільнае размяшчэнне транспартнага сродку на аўтамабільнай стаянцы ў адпаведнасці з правіламі дарожнага руху згодна нанесенай разметцы.

Крок трэці: як потым выехаць са стаянкі?

Тут схема прасцейшая. Зноў прыкладаем картку да счытвальніка на выездзе з тэрыторыі зоны браніравання, а затым, на выездзе з тэрыторыі ўсёй стаянкі, гэтую картку вяртаем кантралёру. Там жа трэба будзе расплаціцца за пададзеную паслугу.

Важна

У выпадку страты электроннай карткі кліент павінен звярнуцца да адміністратара аўтастаянкі.

Колькі ў выніку гэта каштуе

10 рублёў - гэта плата толькі за паслугу браніравання. Яшчэ ж давядзецца аплаціць і час, які машына правяла на паркоўцы. Кошт - 6 рублёў у дзень. Прычым няпоўныя суткі акругляюцца да поўных; ніякай сістэмы скідак няма: за кожныя новы дзень давядзецца плаціць па 6 рублёў.

Да прыкладу, калі вы пакінулі аўто на тыдзень, то калькуляцыя будзе наступнай: 10 рублёў за браніраванне плюс 42 рублі (па 6 рублёў за кожны з 7 дзён). У суме - 52 рублі за стаянку. Хтосьці скажа, што танней прыехаць у аэрапорт на таксі і дакладна гэтак жа вярнуцца назад па прылёце.

Нагадаем, што на астатняй тэрыторыі стаянкі, не адведзенай для ранняга браніравання, дзейнічаюць іншыя тарыфы. Напрыклад, роўна 7 дзён будуць каштаваць 30 рублёў з пагадзіннай тарыфікацыяй. Больш падрабязна з цэнамі можна азнаёміцца на сайце аэрапорта.