Выбух у Растоўскай вобласці РФ: у жылым доме абрынуліся два паверхі

Адная жанчына загінула, яшчэ сем чалавек могуць знаходзіцца пад руінамі.

Выбух бытавога газу стаў прычынай абрынання ў жылым доме ў горадзе Шахты ў Растоўскай вобласці. Пра гэта ТАСС паведамілі ў экстраных службах.

«На дзявятым i восьмым паверсе дзевяціпавярховага дома абрынанне. Інфармацыя аб пацярпелых ўдакладняецца», - сказала крыніца.

Паводле ягоных слоў, дом 1993 года пабудовы, газіфікаваны. Дзевяціпавярховы будынак прымыкае да пяціпавярховіка. Усяго ў ім 72 кватэры. На месцы працуюць пажарна-выратавальныя падраздзяленні ды іншыя аператыўныя службы.

Таксама паведамляецца, што выбух пашкодзіў чатыры кватэры, эвакуаваны 140 чалавек, сямёра выратаваныя.

У выніку пацярпелі восем чалавек, пяць з якіх шпіталізавалі. З папярэдніх звестак, адная жанчына загінула. Яшчэ сем чалавек могуць знаходзіцца пад руінамі.

У прэс-службе ГУ МНС рэгіёна паведамілі, што два паверхі жылога дома абрынуліся ў выніку выбуху.

«Горад Шахты, вуліца Хабарава, 16, паведамленне а 06.18 (менскага часу), папярэдне, у выніку выбуху газу адбылося абрынанне з 9-га да 8-га паверха аднаго з пад'ездаў шматкватэрнага жылога дома. Усе службы экстранага рэагавання выехалі да месца», - гаворыцца ў паведамленні.

Нагадаем, 31 снежня ў Магнітагорску, папярэдне - праз выбух бытавога газу, абрынуўся пад'езд у 10-павярховым доме. Загінулі 39 чалавек.