23 траўня 2019, Чацвер, 15:14
За нашу і вашу свабоду!
Рубрыкі

Айцец Аляксандр Шрамко - жыхарам Сухарава: Трэба дзейнічаць разам

1
АЛЯКСАНДР ШРАМКО
ФОТА: FACEBOOK

Адзіночак, нават калі іх многа, ніхто не баіцца.

Менскі святар Аляксандр Шрамко, якому Беларуская праваслаўная царква Маскоўскага патрыярхату забараніла служыць за крытыку кіраўніка РПЦ Кірыла, распавёў у Фэйсбуку, як паўдзельнічаў у абмеркаванні забудовы менскага раёна Сухарава. Нагадаем, хрысціянская Царква Поўнага Евангелля «Новае жыццё», якая знаходзіцца ў гэтым раёне, зноў пад пагрозай зносу. На яе месцы збіраюцца пабудаваць сярэднюю школу больш чым на тысячу вучняў і басейн. У 2002 годзе царква «Новае жыццё» выкупіла закінуты кароўнік на ўскраіне горада, адрамантавала яго, і з 2004 года там праходзяць набажэнствы.

«Ну вось, ізноў я ўпісаўся за Царкву «Новае Жыццё» (Менск). Проста рок нейкі. Бо мінулая мая забарона 10-гадовай даўніны была звязаная ў першую чаргу з сітуацыяй вакол гэтай царквы, а шырэй - з сітуацыяй са свабодай сумлення ў Беларусі.

Карацей, пабываў на прэзентацыі забудовы раёна. Праблема там не толькі ў «Новым жыцці», якое прызначылі пад знос. Пад гэты самы знос павінны пайсці, што засталіся і зусім нядаўна пабудаваныя ў гэтай былой вясковай мясцовасці дамы. Прычым яшчэ гады 4-5 таму людзям давалі надзелы і запэўнівалі, што іх не крануць, што тут будзе выключна катэджная забудова.

Цяпер там запланавалі шматпавярховае будаўніцтва высокай шчыльнасці. Хоць месца вельмі для гэтага няўдалае, бо раней там праходзіла рэчышча ракі, блізка грунтавыя вады, у новых дамах у падвалах стаіць вада, яны руйнуюцца, і ўжо праз паўгода яны маюць патрэбу ў рамонце.

У людзей рэальнае гора. Прадалі кватэры, уклаліся ў будаўніцтва. Некаторых ужо зносяць не першы раз, яны перабраліся сюды ў надзеі, што іх пакінуць у спакоі, ды і абяцалі ім. І вось... Такі кошт гэтым «генеральным планам». І ніхто пры гэтым не вінаваты. Кожны паасобку ў бюракратычнай машыне робіць сваю справу «паводле правілаў». «Да гузікаў пытанні ёсць? - Не, прышытыя намёртва, не адарваць».

Але хто ж усё ж шыў гарнітур - не даб'ешся.

Усе прысутныя выказаліся супраць праекту, нават прагаласавалі, ніводнага «за». Сказалі, вядома, што гэта галасаванне несапраўднае. Тут, маўляў, не зацвярджэнне, а прэзентацыя. А калі ў вас ёсць заўвагі, то да 7 лютага пішыце, кожны паасобку, усе прапановы будуць разгледжаныя ва ўстаноўленым парадку, і кожнаму будзе высланы афіцыйны адказ. А ўжо як гэта адаб'ецца на канчатковым праекце - будзем вызначаць без вас. Адчуванне такое, што ўсе гэтыя грамадскія абмеркаванні - гэта для выпуску пары.

Пакрычалі, паплакалі і разышліся. А адзіночак, нават калі іх маса, ніхто не баіцца. Нават кожнаму адказаць згодныя. Таму трэба дзейнічаць разам. Запісаўся ў ініцыятыўную групу», - напісаў Аляксандр Шрамко.

ФОТА: АЛЯКСАНДР ШРАМКО/FACEBOOK
ФОТА: АЛЯКСАНДР ШРАМКО/FACEBOOK