Трамп забараніў усім сябрам кангрэса лётаць самалётамі ўрада

Забарона звязаная з шатдаўнам.

Адміністрацыя Дональда Трампа на перыяд шатдаўна забараніла паездкі сябрам кангрэса ЗША на самалётах, якія належаць ураду або зафрахтаваныя ім, без адпаведнага пісьмовага дазволу Белага дома. Пра гэта гаворыцца ў мемарандуме, выпушчаным у пятніцу адміністрацыйна-бюджэтным кіраваннем Белага дома. Дакумент адрасаваны кіраўнікам органаў выканаўчай улады ЗША, паведамляе РБК.

«Праз частковае закрыццё ўрада прэзідэнт папрасіў мяне паведаміць кіраўнікам усіх міністэрстваў і агенцтваў адміністрацыі ЗША пра новую палітыку, якая тычыцца паездак прадстаўнікоў заканадаўчай улады. Ні пры якіх абставінах падчас шатдаўна ніводны з самалётаў, якія належаць, арандаваныя або зафрахтаваныя ўрадам, не будзе падавацца дэлегацыям сябраў кангрэса без пісьмовай згоды кіраўніка апарата Белага дома», - гаворыцца ў дакуменце ад імя выканаўцы абавязкаў дырэктара адміністрацыйна-бюджэтнага ўпраўлення адміністрацыі ЗША Расэла Воўта.

Мемарандуму папярэднічаў канфлікт звязаны са спікеркай палаты прадстаўнікоў, сябрам Дэмакратычнай партыі Нэнсі Пэласі. Яна збіралася ляцець у Афганістан на вайсковым самалёце. Аднак Трамп за некалькі гадзін да яе вылету забараніў ёй такі палёт, матывуючы пастанову адсутнасцю фінансавання, і прапанаваў адправіцца ў камандзіроўку на камерцыйным рэйсе.

Пэласі адпрэчыла гэтую прапанову, скасаваўшы паездку. Яе прэс-сакратар Дру Хэміл патлумачыў, што палітык была гатовая ляцець і камерцыйным рэйсам. Аднак візіт спецыяльна не анансаваўся з меркаванняў бяспекі - тое, што прэзідэнт згадаў яго, «істотна падняло ступень небяспекі для дэлегацыі», падкрэсліў ён.

Шатдаўн у ЗША (частковае прыпыненне працы ўрада праз адсутнасць фінансавання) працягваецца з 22 снежня 2018 года і ўжо стаў рэкордным па працягласці. Прычына крыецца ў рознагалоссях з нагоды фінансавання будаўніцтва агароджы на мяжы з Мексікай - аднаго з галоўных перадвыбарчых абяцанняў прэзідэнта. Дамовіцца прэзідэнту і кангрэсу пакуль не ўдаецца, пытанне фінансавання ўрада праз гэтага таксама не вырашанае.

Напярэдадні Пэласі накіравала Трампу ліст, у якім прапанавала яму перанесці дату традыцыйнага прэзідэнцкага паслання да кангрэсу «Аб становішчы краіны» (State of the Union) альбо перадаць пасланне ў пісьмовым выглядзе. Пэласі патлумачыла, што праз адсутнасць фінансавання органаў улады немагчыма забяспечыць бяспеку на мерапрыемстве. Пастанова Трампа забараніць ёй палёты на самалётах Мінабароны ЗША рушыла ўслед за гэтай прапановай адкласці пасланне.