Захараў: Сёння хакей у Беларусі ўкладваюць у труну

Галоўны трэнер «Юнацтва» ўслед за настаўнікам «Гомеля» раскрытыкаваў кіраўніка Федэрацыі хакея Беларусі.

Галоўны трэнер менскага «Юнацтва» Міхаіл Захараў здзіўлены словамі кіраўніка Федэрацыі хакея Беларусі Генадзя Савілава пра тое, што МХЛ не мае высокакваліфікаваных каманд для спаборніцтва з беларускай камандай U-20.

- Вы скардзіліся, што новы кіраўнік федэрацыі нікога не збірае. Тым не менш, на днях адбылася нарада беларускіх хакейных клубаў. Ці было там прапанаванае што-небудзь цікавае і новае?

- Не ведаю, што ён там збіраў... Хай кіраўнік федэрацыі прачытае вельмі добрае інтэрв'ю фінскага гульца, дзе ён распавёў пра тое, як у іх там уладкавана. Там выразна напісана, усё ў Фінляндыі вырашае трэнерская рада. Яе ўсе цяпер абмяркоўваюць. Дзякуючы трэнерскай радзе фіны тройчы за апошнія шэсць гадоў сталі чэмпіёнамі свету (гаворка пра моладзевую нацыянальную каманду). Калі даслоўна, то «расейцы мацнейшыя, хутчэйшыя, іх больш, але мы за кошт індывідуальнага майстэрства спрабуем іх падолець, і нам гэта ўдаецца. У нас з'явіліся суперхакеісты - Лайне, Ахо і іншыя». А ў нас хто вырашае? Беражкоў, яшчэ там хтосьці...

- Ці было прапанаванае нешта канкрэтнае?

- Не ведаю (смяецца). Навумаў Уладзімір Уладзіміравіч (экс-кіраўнік ФХРБ) падняў хакей з труны. Ён у труне быў, калі ён прыйшоў! Проста падняў! А сёння яго ўкладваюць у магілу, і Савілаў апошні цвік забівае, мяркуючы з таго, што адбываецца. Калі чалавек заяўляе, што (добрых) каманд няма ў МХЛ! Вы пачытайце, што ў Расеі пішуць пра яго! Ён заяўляе, што няма моцных каманд у МХЛ. Хлопцы, вы што? Няма чалавека, які б не пасмяяўся з ягоных слоў!

Пятнаццаць выхаванцаў МХЛ сталі алімпійскімі чэмпіёнамі (у 2018 годзе - заўв). Найлепшы гулец Мікіта Кучараў з «Тампы», ён таксама прайшоў МХЛ. Вось і ўсё. А калі наш старшыня федэрацыі кажа, што гэтая ліга нуль, то хлопцы, можна толькі пасмяяцца з яго, што цяпер усе і робяць, - распавёў Захараў у зносінах з карэспандэнтам «БХ».