Пад Гомелем міліцыянт выпадкова падвёз згоншчыка

Пра тое, што вязе ў сваёй машыне злачынцу, міліцыянт зразумеў не адразу.

18 студзеня супрацоўнікам Кармянскага РАУС паведамілі, што ў Рагачове сагналі легкавы аўтамабіль. Арыентоўку накіравалі ва ўсе раённыя аддзелы вобласці, паведамляе УУС Гомельскага аблвыканкама.

У гэты ж дзень прапаршчык міліцыі пасля службы наважыў з'ездзіць у Рагачоў да бацькоў. Адправіўся на сваёй машыне. Па дарозе ад калегаў ён даведаўся пра згон і праз нейкі час заўважыў ля абочыны легкавік. У цемры марку не зразумеў, але патэлефанаваў у ДАІ і паведаміў пра машыну.

Праехаўшы метраў пяцьдзесят, у святле фар ён убачыў чалавека, які галасаваў, спыніўся і пагадзіўся падвезці. Ужо ў дарозе міліцыянту патэлефанавалі яго калегі і распавялі, што ў кювеце стаяла тая самая, скрадзеная машына, якую шукалі. Міліцыянт у адказ намякнуў, што едзе не адзін, а з магчымым угоншчыкам.

На пад'ездзе да Рагачова аўтамабіль спынілі супрацоўнікі ДАІ. Пад выглядам праверкі дакументаў папрасілі выйсці з аўто кіроўцы і пасажыра. Апошні стаў абурацца, кажучы, што едзе дадому ад бабулі. Да гэтага моманту пад'ехалі аператыўнікі. Бачачы, што сітуацыя развіваецца не паводле сцэнару і ў гісторыю пра бабулю ніхто не верыць, хлопец прызнаўся ў згоне.

Беспрацоўнага 24-гадовага жыхара Рагачова затрымалі. Следчыя распачалі ў дачыненні да яго крымінальную справу.