Лідары апазіцыі Малдовы заявілі, што іх атруцілі ртуццю

Апазіцыянеры заявілі, што сталі мішэнямі для нападаў улады напярэдадні парламенцкіх выбараў.

Двое апазіцыйных лідараў Малдовы ў чацвер абвінавацілі малдаўскую ўлада ў атручванні.

Лідары блока ACUM Мая Санду і Андрэй Нэстасе падазраюць, што ўлада атруціла іх цяжкімі металамі. На прэс-канферэнцыі 21 лютага яны паведамілі, што сталі «мішэнню для нападаў улады, якая хоча іх смерці», паведамляе малдаўскае выданне NewsMaker.

Лідары партый «Дзеянне і салідарнасць» (PAS) і «Платформа Годнасць і праўда» (DA) Мая Санду і Андрэй Нэстасе распавялі журналістам, што звярнуліся да лекараў праз праблемы са здароўем. Аналізы абодвух паказалі атручванне цяжкімі металамі, у тым ліку ртуццю.

«Я прайшла лячэнне, і ўзровень цяжкіх металаў у крыві знізіўся. Але праз некаторы час новыя аналізы паказалі, што ён зноў вырас. Лекары, з якімі я кансультавалася, кажуць, што натуральным шляхам так атруціцца немагчыма. Тое ж самае адбылося з Андрэем Нэстасе. У нас узніклі падазрэнні, улічваючы нападкі ўлады і тое, як яна паступае з тымі, хто з ёй змагаецца», - распавяла Мая Санду.

Нэстасе падтрымаў калегу, адзначыўшы, што яны сталі мішэнямі для нападаў улады, «якая жадае нашай смерці». Нэстасе заявіў, што яго, Санду і іншых калегаў атруцілі, у тым ліку ртуццю.

Кіруючая Дэмакратычная партыя звязала абвінавачванні ў адрас улады з набліжэннем выбараў. «Засталося ўсяго некалькі дзён, і таму ў наш адрас пасыпаліся розныя абвінавачванні, відавочна, неабгрунтаваныя», - сказаў прэс-сакратар дэмакратаў Віталь Гамурар у каментары ProTV.

24 лютага ў Малдове ўпершыню пройдуць парламенцкія выбары паводле новай выбарчай сістэмы: палова парламента будзе выбрана паводле партыйных спісаў, палова - па аднамандатных акругах.

З апытанняў грамадскай думкі вынікае, што ніводная партыя не атрымае абсалютнай большасці, што выкліча шматмесячныя перамовы па кааліцыі ці новыя выбары.