Выбары ва Украіне: Зяленскі і яго партыя «Слуга народа» - лідары электаральных сімпатый

Зяленскага гатовыя падтрымаць 25,1% рэспандэнтаў.

Кандыдат у прэзідэнты Украіны, шоўмэн Уладзімір Зяленскі захоўвае значны адрыў ад канкурэнтаў у рэйтынгу электаральных сімпатый украінцаў. Пра гэта сведчаць вынікі апытання, праведзенага ў лютым Інстытутам сацыяльных тэхналогій «Социополис».

Паводле апытання, калі б выбары праходзілі ў гэтую нядзелю, за яго прагаласавалі б 25,1% тых, хто вызначыўся і збіраецца прыняць удзел у волевыяўленні. За выхад у другі тур таксама змагаюцца Юлія Цімашэнка (15,4%) і Пятро Парашэнка (14,6%). Розніца паміж другім і трэцім месцам - менш за адзін працэнт. Чацвёртым ідзе Юрый Бойка (10,3%), астатнія кандыдаты не набіраюць дзесяці адсоткаў.

Як вынікае з вынікаў, на поўдні і ўсходзе Зяленскі ўпэўнена абыходзіць Юрыя Бойку (19,2% супраць 12,5% на поўдні і 22,7% супраць 13,3% на ўсходзе сярод усіх апытаных), а на захадзе яго падтрымліваюць 16,6% жыхароў - як і Юлію Цімашэнку. Падтрымка Пятра Парашэнкі ў заходніх абласцях - 14%. У цэнтры ў Зяленскага 19% прыхільнікаў.

У другім туры мастацкі кіраўнік «Квартал 95» перамагае ўсіх кандыдатаў з галоўнай пяцёркі. Прычым, калі б ён выйшаў у другі тур разам з Парашэнкам, за яго прагаласавалі б 42% ад усіх рэспандэнтаў, а за дзейнага прэзідэнта - 18%.

У той жа час вера апытаных у перамогу Зяленскага вырасла да 22,4% пры тым, што ў перамогу Парашэнку вераць 25,9%, а Цімашэнкі - 25,3%.

Гатоўнасць узяць удзел у выбарах прэзідэнта агулам выказала 80,3% апытаных.

Парламенцкія рэйтынгі ўзначальвае партыя Зяленскага «Слуга народа». Паводле звестак даследавання, яе гатовыя падтрымаць 21,4% сярод тых, хто мае намер узяць удзел у галасаванні і ўжо вызначыўся са сваім выбарам. Другое-трэцяе месцы займаюць УА «Бацькаўшчына» і «Блок Пятра Парашэнкі «Салідарнасць» (17,7% і 15,1% адпаведна).

Акрамя таго, паводле звестак апытання, 84,1% рэспандэнтаў станоўча ставяцца да ўвядзення забароны займаць пасады ў органах дзяржаўнай улады тым палітыкам, у выніку знаходжання ва ўладзе якіх адбылося значнае пагаршэнне сацыяльна-эканамічнай сітуацыі ў краіне. Амаль 69% украінцаў падтрымліваюць шырокае ўкараненне ва Украіне прамой дэмакратыі, а 58% апытаных выказаліся за тое, каб важныя рашэнні ў жыцці краіны прымаліся на ўсеўкраінскіх рэферэндумах.

Як паведамляецца, апытанне было праведзенае з 8 да 15 лютага 2019 года. Аб'ектам даследавання былі жыхары ўсіх рэгіёнаў Украіны, за выключэннем Аўтаномнай Рэспублікі Крым, Севастопаля і асобных раёнаў Данецкай і Луганскай абласцей, ва ўзросце ад 18 гадоў. Усяго з выкарыстаннем метаду асабістага інтэрв'ю face-to-face было апытана 2409 рэспандэнтаў. Выбарка рэпрэзентатыўная для ўсяго дарослага насельніцтва Украіны паводле полу, узросту, рэгіёнаў пражывання і тыпу населеных пунктаў (гарадскі населены пункт/сяло). Тэарэтычная статыстычная хібнасць выбаркі (з давернай верагоднасцю 0,95 і без уліку дызайн-эфекту) не перавышае 2%.