Раман Кісляк: Нават калі завод пад Берасцем пачне працаваць, мы не спынім наш пратэст

Сёння пратэстоўцы зноў прайшлі калонай цэнтральнымі вуліцамі Берасця.

На гэты раз на традыцыйнае кармленне галубоў прыйшло больш за 150 удзельнікаў. Людзі сабраліся на галоўнай плошчы горада, а потым прайшлі калонай цэнтральнымі вуліцамі Берасця.

Першы раз на плошчы Леніна берасцейцы сабраліся 25 лютага мінулага года. З тых часоў мінуў год, людзі выходзяць на плошчу кожную нядзелю, пішуць скаргі і звароты, сабралі 40 тысяч подпісаў, а ўлады робяць выгляд, што нічога не адбываецца.

Акумулятарны завод пад Берасцем ужо фактычна пабудаваны, на мінулым тыдні на яго запрасілі журналістаў, але толькі тых, хто быў у спісах «АйПаўэра». Пасля гэтай сустрэчы стала вядома, што запуск завода плануюць ужо ў сакавіку, у наступным месяцы запланавана зрабіць першы акумулятар.

- Нават калі завод пачне працаваць, мы не спынім наш пратэст, мы прадоўжым дзейнічаць, і зробім усё, каб закрыць гэту шкодную вытворчасць, - кажа «Белсату» праваабаронца Раман Кісляк.

На гэты раз перад самым пачаткам «кармлення галубоў» быў затрыманы АМАПам актывіст Аляксандр Кабанаў, пазней яго адпусцілі без складання пратаколу. Адзначым, што 24 лютага знізілася колькасць удзельнікаў пратэсту: калі ў мінулыя разы на плошчы збіралася блізу 240 чалавек, то на гэты раз на розныя ацэнкі на акцыю прыйшло 150-180 удзельнікаў. Абмеркаваўшы сітуацыю, людзі ўжо трэцім разам прайшліся цэнтральнымі вуліцамі Берасця.

Нагадаем, жыхары Берасця і Берасцейскага раёна пратэстуюць супраць акумулятарнага завода недалёка ад горада. За год пратэсту было забаронена 57 мітынгаў, 8 дэманстрацый і 12 пікетаў, а таксама мясцовы рэферэндум. Таму людзі збіраюцца на цэнтральнай плошчы Берасця і кормяць галубоў, але і пры такім фармаце ўлады ўжываюць рэпрэсіі. Многіх удзельнікаў кармленняў галубоў затрымлівала міліцыя, людзей штрафавалі і трымалі ў ізалятары.