Грошы Пуціна і Крым: Кангрэс ЗША ўхваліў пакет антыкрамлёўскіх законаў
8- 13.03.2019, 8:06
- 14,681
Палата прадстаўнікоў прагаласавала за тры звязаныя з Расеяй законапраекты.
Законапраект аб непрызнанні суверэнітэту Расеі над анэксаваным Крымам ухвалены Палатай прадстаўнікоў Кангрэсу ЗША, дзе большасць належыць прадстаўнікам Дэмакратычнай партыі, пры 427 галасах «за» і адным «супраць», паведамляецца ў аўторак, 12 сакавіка, у афіцыйным мікраблогу Twitter прэс-службы Палаты прадстаўнікоў, паведамляе dw.com.
The House passed H.R. 596 - Crimea Annexation Non-recognition Act by a vote of 427-1.
— House Press Gallery (@HouseDailyPress) 12 марта 2019 г.
Згодна з законапраектам, «палітыка ЗША палягае ў непрызнанні суверэнітэту РФ над Крымам, яго паветранай прасторай і тэрытарыяльнымі водамі». Калі гэты дакумент ухваліць Сэнат, большасць у якім захоўваюць рэспубліканцы, ён можа быць адпраўлены на падпісанне прэзідэнту ЗША Дональду Трампу.
У той жа дзень Палата прадстаўнікоў ухваліла таксама законапраект пад назвай KREMLIN Act, што можна перакласці як «крамлёўскі законапраект», аднак гэта абрэвіятура, якая расшыфроўваецца як «Законапраект аб мінімізацыі ўмяшання з боку Расеі і абмежаванні расейскіх выведвальных сетак» («Keeping Russian Entrapments Minimal and Limiting Intelligence Networks Act»). Дакумент патрабуе ад кіраўніка нацыянальнай выведкі ЗША Дэна Коўтса цягам 90 дзён падрыхтаваць справаздачы аб тым, што цяперашняе кіраўніцтва РФ мае намер распачаць у выпадку канфлікту з NATO, як яно можа рэагаваць на ўзмацненне ўплыву ЗША і NАТО ва Усходняй Еўропе, а таксама якімі слабасцямі ЗША можа скарыстацца.
Выведка ЗША павінна раскрыць даходы Пуціна
Акрамя таго, Палата прадстаўнікоў ухваліла законапраект «Аб празрыстасці ў дачыненні да Уладзіміра Пуціна», які патрабуе ад выведвальнай супольнасці ЗША падаць звесткі аб сумах даходаў і маёмасці прэзідэнта Расеі. «Уладзімір Пуцін і ягоныя карумпаваныя хаўруснікі імкнуцца аслабіць дэмакратыю ва ўсім свеце, умацоўваючы палітычны кантроль неэтычнымі метадамі, і яны павінны быць прыцягнутыя да адказнасці за свае дзеянні», - заявіла прадстаўніца Рэспубліканскай партыі Эліза Стэфанік, якая ініцыявала законапраект разам з дэмакратам Валам Дэмінгам.
Раней чальцы Палаты прадстаўнікоў заклікалі ўлады Расеі дазволіць правесці бесстаронняе расследаванне забойства Барыса Нямцова і супрацоўнічаць у гэтай справе з ПА АБСЕ і ПАРЕ.
