Марыя Тарасенка: Я бараню свае правы - гэты дэкрэт павінен быць скасаваны

Першы суд паводле справы запісанай у «дармаеды» супраць уладаў пачынаецца ў Гомелі.

15 сакавіка ў судзе Чыгуначнага раёна Гомеля пачнецца першы працэс так званага «не занятага ў эканоміцы» супраць дзяржавы. Бараніць свае правы будзе хатняя гаспадыня Марыя Тарасенка, а дапамагаць ёй будзе праваабаронца Леанід Судаленка, які ў 2017 годзе быў названы адвакатам дармаедаў, піша гомельская «Весна».

«Мы заявілі грамадзянскі пазоў аб кампенсацыі маральнай шкоды, прычыненай дзяржаўнымі органамі. Адказчыкамі з'яўляюцца «камісія ў садзейнічанні занятасці насельніцтва» Чыгуначнага раёна Гомеля і Камітэт працы, занятасцi i сацыяльнай абароны аблвыканкама. Менавіта гэтыя дзяржорганы фармавалі так званыя «базы дармаедаў», - адзначыў Судаленка.

Маральную шкоду жанчына, мабыць, з намёкам «кожнаму па 500» ацаніла на адну тысячу рублёў.

«Уключэнне маіх асабістых звестак у «базу не занятых у эканоміцы» я расцэньваю, як грубае ўмяшанне ў прыватнае жыццё маёй сям'і, як прымус да працы, як прыніжэнне чалавечай годнасці, няроўнасць перад законам і пазбаўленне права без усялякай дыскрымінацыі на роўную абарону законных інтарэсаў. Гэта прычыніла і прадаўжае прычыняць мне глыбокія маральныя пакуты», - напісала Марыя Тарасенка ў пазове суду.

Раней жанчына падавала ў суд Чыгуначнага раёна Гомеля скаргу на ўключэнне яе звестак у «базу не занятых», аднак суд адмовіў у распачынанні справы з прычыны непадведамаснасці скаргі. Адмову раённага суда яна абскардзіла ў апеляцыйнай інстанцыі абласнога суда, хоць мяркуе, што ўжо на самым версе прынятая пастанова не прымаць скаргі, каб не ствараць на гэты конт прэцэдэнтаў.

Праваабаронца Судаленка адзначае, што і старая рэдакцыя дэкрэта №3 пра «дармаедаў» і абноўленая аб «не занятых у эканоміцы» не прадугледжваюць права на судовае абскарджанне, чым і не прамінуў скарыстацца суд.

«Нам давялося памяняць тактыку. Суду ўсё ж давядзецца разгледзець прэтэнзіі чалавека, аднесенага дзяржаўнымі агентамі да катэгорыі «не занятых у эканоміцы». Мы маем намер давесці, што дзяленне людзей, на «занятых у эканоміцы» і «не занятых» з'яўляецца дыскрымінацыяй, якая прычыняе кожнаму нармальнаму чалавеку маральную шкоду», - адзначыў суразмоўца.

Праваабаронца прапануе ўсім, каго ўлада назвала «незанятым у эканоміцы», пісаць скаргі ў камісіі і ў суды. Ён перакананы, што ўжо пасля некалькіх тысяч такіх скаргаў улада перагледзіць сваё дачыненне да народжанай ёй жа праблемы - прымусіць беларуса працаваць за ежу.