19 чэрвеня 2019, Серада, 21:11
Мы ў адной лодцы
Рубрыкі

Паператворчасць: новы абсурд у беларускіх школах

31

У школах ад бацькоў патрабуюць распісаць план, дзе будуць дзеці кожны дзень лета.

Перад пачаткам летніх канікул бацькоў традыцыйна просяць даць інфармацыю пра тое, дзе і з кім будуць знаходзіцца дзеці ў летнія месяцы. Але ў некаторых установах адукацыі гэта даходзіць да абсурду. У гэтым годзе ў адной з гарадзенскіх школ бацькам давялося запаўняць план на кожны дзень, піша nn.by.

Са слоў саміх бацькоў, горш за ўсё, калі напісаць, што дзіця будзе дома. Бо тады яго могуць залучыць у школу. «Мы два леты біліся, каб дачку не запрашалі ў выязны летнік МУС, дзе пад кіраўніцтвам міліцыі дзяцей вучаць розным карысным справам», - падзялілася ў сацсетках адна з мам.

«Я працавала ў адной з гарадзенскіх гімназіі, там настаўнікаў прымушалі збіраць такую інфармацыю па тыднях. І не дай бог бацькі напішуць, што дзіця дома! - абураецца былая настаўніца. - Бацькам задурыць галаву, выклікаючы дзіцяці на разнастайныя сумныя мерапрыемствы, «каб было занятае»! Мае бацькі, у выпадку калі дзіця дома, пісалі, што ён у бабулі. Тады ніхто не чапляўся. А наогул, часцей за ўсё такія штукі - выдумкі мясцовай адміністрацыі. Ад раённага аддзела адукацыі не паступае такі загад».

Навошта ўсё гэта трэба? Немагчыма ж дакладна сказаць, чым будзе занятае дзіця праз месяц у той ці іншы канкрэтны дзень. Тым больш што за дзяцей на вакацыях адказваюць менавіта бацькі, а не школа і чыноўнікі.

Журналісты звярнулася па каментар у аддзел адукацыі Гарадзенскага гарвыканкама, каб даведацца, чыя гэта ініцыятыва і навошта школе падрабязныя справаздачы на кожны дзень, але ніякага адказу так і не атрымалі.