Паборы ДАІ з кіроўцаў узрастуць

Чаго чакаць ад новых правілаў дарожнага руху?

У Беларусі рыхтуецца прыняцце новага зводу правілаў дарожнага руху. Аб некаторых навінах журналістам стала вядома дзякуючы таму, што праект указа вынеслі на «грамадскае абмеркаванне».

Звяртае на сябе ўвагу тое, што ў праекце новых ПДР пашыраныя паўнамоцтвы ДАІ будуць замацаваны заканадаўча.

Напрыклад, інспектары атрымаюць права спыняць любы аўтамабіль на падставе праверкі дакументаў. Дагэтуль беларускія кіроўцы ў спрэчцы з ДАІ маглі спасылацца на адсутнасць прычыны спынення аўто паводле афіцыйных правілаў.

Як зменіцца сітуацыя на дарогах пасля прыняцця новага зводу ПДР?

На пытанні Charter97.org адказвае прадпрымальнік Віктар Гарбачоў:

- Сітуацыя зменіцца - і не ў лепшы бок для кіроўцаў. Фактычна, супрацоўнікам ДАІ далі ў рукі новую «зброю», і яны ёй скарыстаюцца. Бо тое, як кіроўцы размаўляюць з імі зараз, ім вельмі не падабаецца.

ДАІшнікі паглядзелі, што з часам нашы людзі становяцца занадта разумнымі. Правілы дарожнага руху чытаюць, заканадаўства вучаць - і пачынаюць ужываць яго не на словах, а на справе.

«На якой падставе спынілі? Чаму даглядаюць аўто?» - у прадстаўнікоў ДАІ гэтыя пытанні выклікаюць нервовую рэакцыю. Яны ўважаюць, што ў іх адабралі паўнамоцтвы, і настальгуюць па часах, калі наш народ быў малапісьменны і пакорліва ўсё выконваў. А цяпер людзі пачынаюць супраціўляцца!

Таму ўлада прыдумляе новыя крокі, каб пашырыць паўнамоцтвы ДАІ для прыпынку, праверкі і, магчыма, нейкіх далейшых дзеянняў.

- Якіх менавіта?

- Паборы. Паборы і штрафы з кіроўцаў узрастуць. З боку ДАІ цяпер такіх пабораў менш хоць бы таму, што яны вымушаныя радзей спыняць. А цяпер ім даецца свабода: вось, хлопцы, спыняйце, правярайце дакументы, пасведчанні кіроўцаў - што хочаце. Мы ўносім змяненні ў ПДР...

А пасля прыпынку аўто - правярайце ўжо вогнетушыцель, аптэчку і ўсё, што хочаце. І штрафы, штрафы, штрафы...

Гэта чарговая зброя супраць кіроўцаў. Чарговы патрон зарадзілі - каб «паліць» штрафамі па насельніцтве.

Опцыю надгляду асабістых аўто ў Беларусі часта выкарыстоўваюць у палітычных мэтах: ДАІ спыняе актывістаў, якія спрабуюць даехаць да месца правядзення акцый пратэсту. Ці стане такіх злоўжыванняў яшчэ больш?

Вядома. Кожны раз, калі я еду на нейкае мерапрыемства - спыняць, часова затрымаюць на гадзіну-дзве-тры... Аўто адправяць на дагляд: маўляў, нумары не такія і гэтак далей.

Цяпер гэтая практыка яшчэ больш узмоцніцца, гэта адназначна. Чым даўжэй рэжым чапляецца за ўладу - тым больш ён змяняе заканадаўства на сваю карысць. Гэта тычыцца не толькі ПДР.

Паглядзіце хоць бы на новыя правілы аплаты «аховы» мітынгаў. Шэсць тысяч рублёў за тое, каб рабіць тое, што і так дазволена Канстытуцыяй!

Новыя ПДР - гэта тое ж самае. Усё больш і больш законаў, якія прадугледжваюць новыя паборы. Усё вузейшая і вузейшая прастора для свабодных людзей, якія ўмеюць самі шукаць інфармацыю і ведаюць пра свае правы. Улада спрабуе ўсталёўваць рамкі там, дзе яна іх раней не паспела паставіць.

- У пачатку 2014 года ўвялі дзяржаўную мыту за права допуску аўтамабіля да ўдзелу ў руху. З таго часу беларускія кіроўцы ўсё часцей байкатуюць тэхагляд. Як вы ацэньваеце гэтую акцыю непадпарадкавання?

- Без тэхагляду ездзіць 50% усіх аўто - кожны другі. Кіроўцы самі ацанілі яе тым, што масава да яе далучыліся.

Магчыма, беларусы і плацілі б дарожны падатак, калі б бачылі вынік усіх гэтых укладанняў. Як такі, дарожны збор - гэта пасмешышча. Людзі ездзяць па дарогах і выдатна бачаць, што іх стан з году ў год, асабліва ў рэгіёнах, становіцца горш.

У абласцях, у малых гарадах, у дварах дарожныя пакрыцці пакідаюць жадаць лепшага - і насельніцтва гэта бачыць. Людзі не жадаюць плаціць у пустэчу - гэта раз.

Па-другое, ужо няма тых заробкаў, якія былі 10 гадоў таму, калі можна было 150-200 даляраў выняць і аддаць за тэхагляд на год наперад. Сёння людзі ў рэгіёнах за месяц атрымліваюць у лепшым выпадку 150-200$ і не бачаць сэнсу цэлы заробак аддаваць невядома куды.

Змяненне правілаў дарожнага руху, паверце, стане адным з элементаў па праверцы кіроўцаў на выплату дарожнага збору. На дарогах ДАІ даецца права правяраць любыя дакументы, удакладняць асобу кіроўцы. Гэта зачэпка для таго, каб 50% кіроўцаў, якія не праходзяць тэхагляд, вылавіць на працягу паўгода і прымусіць аплаціць дарожны збор.

Я салідарны з беларускімі кіроўцамі: не бачу сэнсу плаціць гэты дарожны збор плюс аплачваць бензін, што пастаянна даражэе. Падумаць толькі: з пачатку года ён падаражэў ужо 10 раз. З такімі тэмпамі бензін да Новага года будзе каштаваць ужо 2 рублі.

Нармальных заробкаў няма, кошт паліва расце, падаткі павышаюцца - людзей абкладваюць з усіх бакоў.

- Што вы параіце рабіць кіроўцам, якія сутыкнуцца з новымі правіламі і новымі паборамі на дарогах?

- Па-першае, вучыць заканадаўства. Нават са зменамі, якія ўлады ўнясуць у ПДР, можна знайсці нейкую шчыліну, нейкую неадпаведнасць у законах.

Таму - вучыце заканадаўства, вазіце з сабой зборнікі законаў: ад новых ПДР да Канстытуцыі. Каб мець магчымасць прад'явіць пісьменна супрацоўнікам ДАІ свае аргументы.

- А калі пісьменныя аргументы не дапамогуць? Ці магчыма, што кіроўцы паўтораць стыхійныя пратэсты - накшталт таго, як было ў 2011-м падчас акцый «Стоп бензін»?

- Усё магчыма. Дзесьці гайку сарве: ці рост коштаў на бензін, або «дармаедскія» камісіі, ці новыя ПДР, ці нешта яшчэ.

Болт сарвецца, таму што насельніцтва калісьці не вытрымае ўсіх гэтых пабораў. Усе вядзе да таго, што супраціў з боку народа будзе. Заробак не павышаецца, новыя падаткі ўводзяцца, жыццё даражэе - занадта шмат фактараў складваецца адзін да аднаго.

Я не Настрадамус, каб зараз сказаць, як будуць развівацца падзеі. Але незадаволенасць ёсць і яна расце. Яшчэ 4-5 гадоў таму ў народзе было маўчанне, цішыня. А цяпер усё рабочыя, вяскоўцы, простыя людзі - абураныя. Я, апазіцыянер, іду па вуліцы і маўчу - а яны кажуць пра тое, што адбываецца ў краіне. Яны распавядаюць пра гэта на прыпынках, у паліклініках, банках, ашчадных касах...

І ўсюды - плююцца пры згадванні пра гэту ўладу. Усюды «ён» усім надакучыў. Усюды ўсё лаюць гэтыя новыя падаткі, падаражэнні, павышэнні...

Усе выдатна разумеюць, да чаго гэта вядзе. І кажуць: «Мы гэтага не дапусцім, ды колькі ж можна?». У вёсках, дзе 10 гадоў маўчалі і ішлі галасаваць за гэтую ўладу, цяпер кажуць, што страшна паўтарыць. Ранейшых «куміраў» гатовыя даслоўна парваць.

Для штуршка толькі трэба нешта невялікае. А што - гэта ўжо ад уладаў залежыць, што яны зноў людзям «падсунуць». Можа, дзесьці міліцыя паб’е маленькае дзіця - і пачнецца бунт, пра які ўсе пачуюць. І народ будзе не спыніць.

Таму - чакаем таго выпадку, калі хтосьці дзесьці паднясе запалку. Улада паднясе - а народ устане.

Калі вам спадабаўся артыкул, вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL 97 1160 2202 0000 0002 1671 1123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас charter97@gmail.com