Зяленскі: Санкцыі супраць Расеі могуць быць узмоцненыя
15- 18.06.2019, 13:24
- 9,676
Гэта вагар для вяртання акупаваных РФ украінскіх тэрыторый.
Прэзідэнт Украіны Уладзімір Зяленскі заявіў у інтэрв'ю нямецкай газеце Bild, апублікаваным 18 чэрвеня, што санкцыі супраць Расеі павінны быць пашыраныя, калі наяўныя не прывядуць да жаданага эфекту (пераклад - gordonua.com).
Са слоў Зяленскага, "санкцыі - гэта дыпламатычны інструмент для дасягнення вынікаў", такіх як спыненне агню і аднаўленне тэрытарыяльнай цэласнасці і суверэнітэту Украіны. Прэзідэнт адзначыў, што "калі гэты інструмент не працуе, то механізм павінен быць пашыраны".
Ён падкрэсліў, што санкцыі - гэта адзіны вагар для вызвалення акупаваных тэрыторый.
Журналіст сказаў, што ў Нямеччыне ідуць дэбаты з нагоды мэтазгоднасці антырасейскіх санкцый, бо яны "не ўплываюць на паводзіны Крамля".
Зяленскі адказаў, што "санкцыі могуць быць узмоцнены, калі іх эфект не будзе прымальным".
У дачыненні да Расеі дзейнічаюць індывідуальныя і сектаральныя абмежавальныя захады Еўрапейскага звязу ў сувязі з агрэсіяй на Данбасе, а таксама санкцыі, уведзеныя пасля анэксіі Крыму ў 2014 годзе. У сакавіку 2019 года санкцыйных спіс быў пашыраны, у яго ўключылі восем грамадзян РФ, якія маюць дачыненне да нападу на ўкраінскія вайсковыя караблі ў Чорным моры.
20 чэрвеня Еўрапейскі Звяз плануе падоўжыць эканамічныя санкцыі супраць Расеі.