Сямашка прагаварыўся, навошта беларусам «танны» бензін напраўду

Ніякай лірыкі, клопату пра людзей і іншай сацыяльнай дзяржавы.

За апошнія некалькі гадоў беларускія аўтамабілісты прывыклі да «жарсцяў адносна бензіну», што шчодра прыпраўленыя размовамі пра клопат з боку дзяржавы, піша «Салiдарнасць».

Узяць праславутае падвышэнне коштаў бензіну на адну капейку.

Што звычайна ў гэтым выпадку казалі чыноўнікі? Маўляў, цэны бензіну мы павышаць, вядома ж, будзем (а як інакш) - але зробім мы гэта асцярожна і акуратна, з усім клопатам пра дарагі беларускі народ. Сацыяльная дзяржава, як ніяк. Адна капейка, не болей.

Ці іншая «санта барбара»: чаму нельга адвязаць дарожны збор ад тэхагляду і ўключыць яго ў кошт аўтамабільнага паліва. Здавалася б, ідэя ўжо даўно наспела. Але не - і тут беларускія ўлады думаюць пра простых беларусаў. Не хочуць уключаць збор, каб, не дай бог, бензін не падаражэў.

Гледзячы на ўсё гэта, у нейкі момант можна расчуліцца. Малайцы, клапоцяцца пра кашалькі шараговых беларусаў, як могуць, стрымліваюць кошты бензіну.

Усю гэтую вясёлкавую карцінку перакрэслівае адна фраза віцэ-прэм'ера і па сумяшчальніцтве амбасадара ў РФ Уладзіміра Сямашкі...

З яго слоў, далей павышаць кошты бензіну ў Беларусі «немагчыма» і тлумачыць чаму. Па-першае, таму што «пакупніцкая здольнасць грамадзян Беларусі не дазваляе гэтага зрабіць». А, па-другое, таму што ў суседняй Расеі, з якой у нас няма мяжы, бензін і дызельнае паліва можна купіць на 8-10% танней!

- Калі гэтая розніца ў коштах стане большай, то паўстане новая праблема масавага ўвозу ў Беларусь з Расеі танных нафтапрадуктаў, - кажа тую самую фразу Сямашка.

Вось яна, галоўная прычына, па якой беларускія чыноўнікі павышаюць кошты паліва на адну капейку. Вось чаму ўлады так нерашуча адвязваць дарожны збор ад тэхагляду. Ніякай лірыкі, клопату пра людзей і іншай сацыяльнай дзяржавы. Проста халодны разлік.

Застаецца толькі здагадвацца, колькі б каштаваў бензін у Беларусі, калі б беларускія чыноўнікі маглі самастойна ўсталёўваць увазныя мыты і рэгуляваць на яго кошты.