20 лiпеня 2019, Субота, 20:04
Мы ў адной лодцы
Рубрыкі

«Празорлівая» з тэлевізара выманіла ў беларускі $45 тысяч

15

«Празорлівая» забараніла жанчыне звяртацца ў міліцыю.

Жыхарка Пінскага раёна звярнулася ў міліцыю з просьбай дапамагчы ёй вярнуць 45 тысяч даляраў, якія яна пералічыла празорцам і лекарам, паведамляе газета «Пинский вестник».

У снежні мінулага года пацярпелая глядзела па спадарожнікавай тэлевізіі тэлеперадачу на канале «8ТВ РУ», дзе вядучай тэлефанавала тэлеглядачка, з якой вёўся дыялог. З дыялогу было зразумела, што вядучая перадачы па імі Ядвіга з'яўляецца празорлівай, а жанчына, якая тэлефанавала ў студыю, падзякавала ёй за дапамогу ў «зняцці сурока».

Гэтая перадача зацікавіла жыхарку раёна, яна запісала нумар тэлефона, названы ў тэлеперадачы, і праз нейкі час усё ж такі патэлефанавала. Не дачакаўшыся злучэння, перапыніла званок, вырашыўшы, што ўсё гэта падман. Аднак пазней на яе тэлефон патэлефанавала жанчына і прадставілася «Тамарай Сяргееўнай - памочніцай празорлівай Ядвігі». Затым яна стала задаваць пытанні: установачныя звесткі жанчыны, маёмаснае становішча, склад сям'і і папрасіла выслаць сваю фатаграфію праз вайбер.

Праз некаторы час памочніца празорлівай зноў патэлефанавала і паведаміла, што над сям'ёй навіс радавы праклён, сама жанчына неўзабаве захварэе на рак, а яе дзеці не дажывуць да 30 гадоў.

«Празорцы» забаранілі жанчыне звяртацца ў міліцыю - маўляў, калі яна не паслухаецца, то зробіць горш сваёй сям'і, - і вымусілі неаднаразова пералічваць ім грошы. У агульнай складанасці за тры месяцы пацярпелая пералічыла 45 тысяч даляраў.

Паводле звестак факта распачатая крымінальная справа за махлярства. Зараз зламыснікаў шукаюць.