У Гомелі з акна шматпавярхоўкі выкінулі сабаку

Год таму ў гэтым жа двары адбылася аналагічная сітуацыя.

Мінулай ноччу ў Гомелі прыкладна а 22.40 выкінулі сабаку з акна шматпавярхоўкі. Трагедыя адбылася па адрасе Ільіча 270а. Жывёла, хатні дагледжаны сабака з ашыйнікам, разбілася насмерць, піша gomel.today.

Пачалося ўсё з гучнага пляску, як быццам нешта падае з вышыні. Здараецца, што з верхніх паверхаў скідваюць бутэлькі і смецце, аднак гэтым разам, на жаль, гэта была не пластыкавая бутэлька і нават не пакет з адходамі. З акна выкінулі сабаку. Характэрна, што год таму ў чэрвені ў двары гэтага ж дома здарылася падобная гісторыя - прыкладна а 22.30 невядомыя выкінулі сабаку ў нашыйніку з балкона шматпавярховіка.

На гэты раз жыхары адразу ж выклікалі міліцыю, на месцы здарэння працавалі супрацоўнікі Следчага камітэта.

«Кажуць, набой двойчы ў варонку не трапляе. Трапляе, ды яшчэ як.

Год таму, калі памятаеце, быў тут у нас скандал. Праз балкон дома, дзе я часова пражываю, скінулі сабаку. Тады яшчэ я выклікаў міліцыю, а мяне самога і забралі.

Тады міліцыя вельмі аператыўна распавяла і мне, і сайту, што жывадзёра знайшлі і ён панясе пакаранне. А вось Следчы камітэт, якому аддалі справу, сышоў у маўчанне. Прайшло пару месяцаў з моманту, як міліцыя заявіла, што знайшла вырадка, а СК выклікаў мяне на допыты як сведку і следчы казаў, што - «шукаем».

Марыя Крываногава (афіцыйная прадстаўніца следчага камітэта -заўв. рэд.), прашу прабачэння, як вы мне тады адказалі на пытанне? Былі ў нас нейкія зносіны з гэтай нагоды.

Увогуле, роўна праз год пасля таго выпадку, пасля таго, як міліцыя заяўляла, што знайшла таго, хто гэта рабіў, а СК сышоў у адмову і цягаў мяне на допыты, у нас выкінулі сабаку яшчэ раз. Сабака з ашыйнікам, добрай пароды (не ведаю, якой, не разбіраюся).

Зноў выклікаў міліцыю. Чакаю, ці забяруць мяне зноў. Што знойдуць і забяруць таго, хто гэта робіць, я ўжо не асабліва спадзяюся» - піша ў Фэйсбуку відавочца здарэння Пётр Кузняцоў.