Крымчане, якія ўзялі пашпарт РФ пасля анэксіі, у ЕЗ не заедуць
14- 22.07.2019, 20:39
- 25,335
Пра гэта заявіў кіраўнік дыппрадстаўніцтва ЕЗ у Маскве Маркус Эдэрар.
Расейскія пашпарты, выдадзеныя жыхарам акупаванага Крыма пасля анэксіі, не будуць прымаць пры звароце па шэнгенскую візу. Пра гэта ў інтэрв'ю ТАСС сказаў кіраўнік дыппрадстаўніцтва ЕЗ у Маскве Маркус Эдэрар.
«Усім вядома, што ЕЗ не прызнаў і не прызнае незаконную анэксію Крыма і Севастопаля Расеяй. Таму расейскія пашпарты, выдадзеныя ў Крыме расейскімі ўладамі пасля анэксіі, не будуць прызнавацца i прымацца пры звароце па шэнгенскую візу», - сказаў ён.
Эдэрар назваў два спосабы легальнага атрымання шэнгенскай візы для жыхароў Крыма: па дакументах, выдадзеных Расеяй да анэксіі ўкраінскага паўвострава, і па пашпарце Украіны.
І ў першым, і ў другім выпадках жыхары Крыма павінны звяртацца па шэнгенскую візу ў консульства краін ЕЗ, размешчаныя ва Украіне, а не ў Расеі.
Калі ў жыхара Крыма ёсць біяметрычны ўкраінскі пашпарт, то ён можа здзяйсняць бязвізавыя паездкі ў краіны Шэнгенскай прасторы.