Сучасныя лецішчы пад Менскам: што прапануюць і колькі яны каштуюць

У садовых таварыствах пад Менскам выстаўлены на продаж сотні лецішчаў.

У асноўным гэта шчытавыя пабудовы 1970-1980-х гадоў, аднак сустракаюцца і сучасныя варыянты - невялікія каркасныя дамы плошчай 40-60 квадратных метраў. Як яны выглядаюць і колькі каштуюць - глядзіце ў аглядзе onliner.by.

У садовым таварыстве «Крышталь-сад», каля Ракава (30 км ад МКАД), прадаецца абсалютна новае лецішча - амаль 6 сотак зямлі і «каркаснік» плошчай 42 кв. м. Каркас дома металічны, уцеплены мінватай і абабіты звонку блокхаузам. На падлозе дошка, дах з металадахоўкі. У дом заведзена электрычнасць, водаправод цэнтральны. Дом прадаецца за 33 483 рубля ($16 500). «Магчымы продаж за крыптавалюту!» - удакладняе ў аб'яве прадавец.

Амаль 73 000 рублёў ($35 900) просяць за лецішча ў садовым таварыстве «Фізік» (18 км ад МКАД у Мядзельскім кірунку). «Новы сучасны дом для людзей, якія цэняць камфорт, утульнасць і мінімалізм», - так апісвае гэты варыянт агенцтва нерухомасці.

Агульная плошча дома з мансардай 69 кв. м, надзел - 4 соткі. З камунікацый тут ёсць электрычнасць, свідравіна, мясцовая каналізацыя з санвузлом у доме, ёсць бойлер. На пляцы таксама знаходзяцца гаспадарчы блок для захоўвання садовых прылад і пація. Дом прадаецца з унутраным аздабленнем і выглядае абсалютна гатовым для пераезду новых уласнікаў.

Недалёка ад Фаніпаля (16 км ад Менска) выстаўленае на продаж лецішча за 42 615 рублёў ($21 000). Пляц немалы - 10,5 соткі, плошча дома - 55 кв. м. «Дом будавалі для сябе з якасных матэрыялаў. Прадаем у сувязі з пераездам у іншы горад», - піша ўласнік.

Як сказана ў аб'яве, лецішча пабудавана паводле фінскай каркаснай тэхналогіі. Дом з тэрасай стаіць на палева-вінтавым падмурку, у сценах - 150 мм мінваты, дах накрыты металадахоўкай. Звонку і знутры каркас абабіты імітацыяй бруса. Па доме разведзеная электрыка, газавая труба праходзіць за 5 метраў.

«Магчыма круглагадовае пражыванне. Вядзецца абмеркаванне аб пераходзе статусу садовага таварыства ў катэджную забудову», - удакладняе ўласнік.

Яшчэ адное каркаснае лецішча, якое можна выкарыстоўваць і для пражывання цэлы год (з запэўнення ўласніка), знаходзіцца ў СТ «Чарніца», што за 20 км ад МКАД у Мядзельскім кірунку. Гэта нават не лецішча ў традыцыйным разуменні.

«Маляўнічы надзел знаходзіцца на краі садовага таварыства, проста ў бярозавым гаі, далей лес. Выдатнае месцазнаходжанне», - апісвае месца ўласнік, і з ім цяжка не пагадзіцца.

Плошча дома 100 квадратных метраў. Зашмат для лецішча, але для катэджа - сама тое. Прадаецца лецішча за 79 142 рубля ($39 000).