На 120 аб'ектаў маёмасці Атамбаева накладзены арышт

Арыштаваныя рахункі экс-прэзідэнта Кыргызстана і ягонай жонкі Раісы Атамбаевай у 25 банках.

У рамках расследавання крымінальных спраў, фігурантам якіх з'яўляецца былы прэзідэнт Кыргызстана Алмазбек Атамбаеў, накладзены арышт на 120 аб'ектаў яго маёмасці, банкаўскія рахункі і каштоўныя паперы. Пра гэта ў пятніцу, 16 жніўня, паведамілі ў прэс-службе Генпракуратуры краіны, паведамляе DW.

«Арыштаваныя рахункі ў 25 банках, якія належаць Атамбаеву, яго жонцы Раісе, а таксама шэрагу прадпрыемстваў і фірмаў сям'і экс-прэзідэнта», прыводзіць словы прадстаўніка Генпракуратуры агенцтва «Интерфакс».

Акрамя таго, у МЗС Кыргызстана ўдакладнілі, што арышт накладзены на маёмасць тэлеканалу «Апрель», уладальнікам якога з'яўляўся экс-прэзідэнт. Зроблена гэта, аднак, «не ў сілу рэдакцыйнай палітыкі» канала або праз яго «пазіцыі ў дачыненні да ўладаў», удакладнілі ў ведамстве.

Нарэшце, аналагічныя санкцыі закранулі кампаніі і арганізацыі, што належаць сям'і Атамбаева, уключаючы найбуйнейшае прадпрыемства машынабудаўнічага комплексу «Кыргызавтомаш», а таксама шэраг аб'ектаў нерухомасці ў Бішкеку і ў сельскай мясцовасці.

Атамбаеў пакінуты пад арыштам

Раней 16 жніўня бішкекскі гарадскі суд пакінуў без задавальнення хадайніцтва абароны аб змене меры стрымання Атамбаева. Экс-прэзідэнт будзе заставацца пад арыштам да 26 жніўня.

У сваю чаргу жонка былога кіраўніка дзяржавы заявіла, што ў дачыненні да яе на сведчанне экс-загадчыка аддзела апарата прэзідэнта Манаса Арабаева распачалі крымінальную справу ў падазрэнні ва ўчыненні ціску на суддзяў паводле шэрагу спраў.

Былому прэзідэнту Кыргызстана ставіцца ў віну ўчыненне шэрагу асабліва цяжкіх злачынстваў падчас аперацыі па яго затрыманню. Атамбаеў падазраецца ва ўжыванні гвалту супраць прадстаўнікоў улады, арганізацыі масавых беспарадкаў, забойстве, замаху на забойства, забойстве супрацоўніка праваахоўных органаў і арганізацыі захопу закладнікаў, заявіў начальнік упраўлення Генпракуратуры Замір Бейшакееў.

Двухдзённая аперацыя затрымання Атамбаева

Праваахоўнікі 7 жніўня двойчы спрабавалі ўзяць штурмам рэзідэнцыю ў сяле Кой-Таш. Падчас распачатых беспарадкаў пацярпела блізу 45 чалавек, намеснік камандзіра спецназа ДКНБ «Альфа» атрымаў агнястрэльнае раненне і пасля памёр, а шэсць спецназаўцаў былі ў заложніках у прыхільнікаў Атамбаева.

На наступны дзень у Кой-Таш былі сцягнутыя блізу 3000 супрацоўнікаў міліцыі і спецтэхніка. Пасля двухгадзіннага супрацьстаяння міліцыі Атамбаеў здаўся. Спробу мітынгу яго прыхільнікаў вечарам таго ж дня ў цэнтры Бішкека жорстка задушылі супрацоўнікі сілавых структур. Супраць мітынгоўцаў ўжывалі святлошумавыя гранаты і слёзатачывы газ.

Алмазбек Атамбаеў быў прэзідэнтам Кыргызстана з 2011 да 2017 года. У канцы чэрвеня 2019 года парламент пазбавіў яго недатыкальнасці.