ЦБ РФ страціў на юанях $1,8 млрд за два дні

Дэдалярызацыя рэзерваў у РФ працягвае прыносіць свой сумны плён.

Панічны рывок у кітайскія юані, зроблены Банкам Расеі ў мінулым годзе, працягвае прыносіць свой сумны плён, піша finanz.ru.

Пастанова ўладаў КНР «адпусціць» курс нацыянальнай валюты ў адказ на чарговы раўнд мытаў ад ЗША абярнулася для ЦБ РФ шматмільярднымі стратамі на курсавых розніцах.

Паводле звестак Refinitiv, у панядзелак курс юаня да даляра на афшорным рынку ў Ганконгу падаў на 1,9% і абнавіў мінімумы з 2008 года - 7,09 юаняў за даляр.

З пятніцы, калі ЗША анансавалі 10-працэнтныя мыты на кітайскія тавары ў аб'ёме 300 млрд даляраў у год, юань страціў 2,7%, што зрабіла імклівую дэвальвацыю рэкорднай са жніўня 2015 года.

Для ЦБ РФ, які ўклаў у юані 14,2% рэзерваў, або 67 млрд даляраў на пачатак года, абвал курсу прынёс страты на 1,8 млрд даляраў.

Назапашаныя страты ад дэдалярызацыі ЗВР і іх спешнага пералічэння ў Кітай набліжаюцца да 8 млрд даляраў, сведчаць разлікі finanz.

Як вынікае са справаздачы ЦБ у кіраванні валютнымі актывамі, асноўную частку юаняў - на 55 млрд даляраў - ён купіў у першым паўгоддзі 2018 года, калі курс кітайскай валюты вагаўся блізу 2 летніх максімумаў - паміж 6,2 і 6,4 юаня за даляр.

З тых часоў курс даляра да юаня вырас на 14,3%. І гэта не мяжа, папярэджвае галоўны па Кітаю Capital Economics Джуліян Эванс-Прытчард.

Народны банк КНР «дэ-факта ператварыў абменны курс юаня ў зброю» для гандлёвай вайны з ЗША, кажа ён (цытаты паводле The Wall Street Journal).

Каб кампенсаваць эфект ад мытаў Трампа, Кітай аслабіць юань да 7,3 за даляр да канца гэтага года і 7,5 за даляр - да канца наступнага, прагназуе Эванс-Прытчард. Для ЦБ РФ такі сцэнар азначае страты на суму яшчэ блізу 3,7 млрд даляраў.

Банк Расеі змяніў структуру ЗВР у адпаведнасці з новымі выклікамі, якія стаяць перад краінай, тлумачыла ў траўні дэпутатка Дзярждумы першая намесніца старшыні ЦБ Ксенія Юдаева.

«Мы памянялі структуру актываў Банка Расеі... мы паспрабавалі гэтую структуру прывесці ў адпаведнасць з тым, як мы бачым рызыкі, з якімі мы можам сутыкнуцца», - заявіла яна.