Саакашвілі: Пуцін плануе «далучыць» Грузію, Арменію, Малдову, Беларусь і частку Украіны

Са слоў палітыка, Пуцін надумаў «аднавіць» Савецкі Саюз да 2024 года.

Прэзідэнт Расеі Уладзімір Пуцін надумаў да 2024 года аднавіць Савецкі Саюз, заявіў былы губернатар Адэскай вобласці і экс-прэзідэнт Грузіі Міхаіл Саакашвілі, піша «Грузія онлайн».

«Пуцін плануе далучыць Грузію, Арменію, Малдову, Беларусь, асноўную частку Украіны, акрамя заходняй», - паведаміў Саакашвілі.

«Гэта ягоны план. Часткай гэтага плана на гэтым этапе з'яўляецца прымусіць гэтыя краіны абвясціць нейтралітэт і аслабіць іх палітычных лідараў. Горы, якія цяпер за вамі, больш не будуць падзяляць дзве краіны, гэта будзе адзіная дзяржава, дзе спакойна будуць перасоўвацца іх жаўнеры, прыязджаць іх чыноўнікі, каб кіраваць намі. Мы будзем наліваць ім віно, забаўляць, лізаць ногі і станем зноў рабамі. Вось гэта іх план, за якім няўхільна стаіць Іванішвілі. Гэты план не разумеюць старыя палітыкі, але супраць гэтага плану можаце паўстаць толькі вы, грузінская моладзь, толькі тыя, хто нарадзіўся і вырас у незалежнай Грузіі», - адзначыў Саакашвілі ў відэазвароце.

Паводле ягоных слоў, «Грузія абавязкова расквітнее».

У жніўні Пуцін адмовіўся каментаваць свой статус пасля заканчэння дзейнага прэзідэнцкага тэрміну: «Што тычыцца 2024 года, то пра гэта рана казаць. Сёння яшчэ 2019 ».

Bloomberg са спасылкай на свае крыніцы пісаў, што памочнікі і дарадцы Пуціна шукаюць спосаб падоўжыць ягонае знаходжанне ва ўладзе. Адзін з разгляданых Крамлём варыянтаў - пасада прэм'ер-міністра з «пашыранымі паўнамоцтвамі» і лідара «Адзінай Расеі» пасля парламенцкай рэформы.