20 лютага 2020, Чацвер, 1:06
Засталося зусім крыху
Рубрыкі

У Гарадзеі абмяркоўваюць магчымае затрыманне дырэктара цукровага камбіната

36
У Гарадзеі абмяркоўваюць магчымае затрыманне дырэктара цукровага камбіната
МІХАІЛ КРЫШТАПОВІЧ. ФОТА: CTV.BY

Яго знялі з самалёта «Белавія».

Тое, што дырэктар Гарадзейскага цукровага камбіната Міхаіл Крыштаповіч затрыманы, жыхары пасёлка Гарадзея абмяркоўваюць каля крамы: «Разумны мужык, падняў завод, за ім людзі сталі жыць». Са слоў мясцовых, у суботу на камбінаце быў ператрус, кабінет кіраўніка нібыта апячаталі.

Крыніца tut.by кажа, што менавіта дырэктара камбіната здымалі з таго самага самалёта, які развярнулі над Польшчай і вярнулі ў Беларусь. Але афіцыйнай інфармацыі пра затрыманне Крыштаповіча няма.

- Сёння выхадны дзень, камбінат стаіць. Прыходзьце ў панядзелак, - кажуць на цэнтральнай прахадной Гарадзейскага камбіната. Усе пытанні аб магчымым затрыманні кіраўніка Міхаіла Крыштаповіча тут абрываюць: «Мы гэтага не ведаем, ён у адпачынку».

Гарадзея - гарадскі пасёлак у Нясвіжскім раёне, тут жыве крыху больш за 4 тысячы чалавек, і многія мясцовыя жыхары працуюць на цукровым заводзе. Хоць навіны ў Гарадзеі разлятаюцца хутка, некаторыя ледзь не адразу ўцякаюць, пачуўшы пытанне пра Міхаіла Васільевіча.

- Абы праца была і плацілі, не ў курсе ўсяго, мне гэта не трэба, - кажа на хаду жанчына, якую мы сустракаем недалёка ад завода.

Паводле інфармацыі крыніцы, знаёмай з роднымі дырэктара, Міхаіл Крыштаповіч знаходзіўся на борце таго самага самалёта Менск - Мюнхен, які развярнулі над Вроцлавам і пасадзілі ў Гародні. Менавіта ён і быў зняты з рэйса. Пра гэта кажуць і крыніцы pressball.by. Гэта ж пацвярджае адзін з супрацоўнікаў цукровага камбіната.

ФОТА: TUT.BY

- Учора даведаліся, што Крыштаповіча знялі з самалёта. Учора ж прыязджалі, завод трэслі, ператрус быў, ягоны кабінет нібыта апячаталі, - пакуль мужчына распавядае, каля яго спыняюцца жанчыны і тут жа лезуць у размову:

- Людзям абы паляпаць! Дай толькі пагаварыць. Крыштаповіч падняў завод. Можа, ён і жыў (маецца на ўвазе добра. - Заўвага. TUT.BY), дык і людзі за ім жылі. Гэта выдатны кіраўнік, добры мужык. Ніхто не ведае, што там нарабiлася.

ФОТА: TUT.BY

- У чацвер Крыштаповіч быў на працы, я яго бачыў, а ў пятніцу паляцеў у адпачынак, - кажа мужчына, які працуе на цукровым заводзе.

Міхаіл Васільевіч разам з жонкай жыве ў двухпавярховым доме ў Нясвіжы на ціхай вуліцы ля возера. Праз дарогу ад яго - дом пляменніка. Калі мы пад'ехалі, каля катэджа стаяла засмучаная жанчына і нешта расказвала іншым жанчынам. Пачуўшы наша пытанне, яна адмовілася ад каментароў і знікла ў двары дома Міхаіла Крыштаповіча.

МУС, КДБ, Памежкамітэт пакуль не пракаментавалі інцыдэнт з самалётам, у СК не могуць «ні пацвердзіць, ні зняпраўдзіць інфармацыю».

Нагадаем, 24 студзеня, самалёт «Белавія», які ляцеў маршрутам Менск - Мюнхен, развярнулі на падлёце да Вроцлава і пасадзілі ў Гародні.

Як паведамляюць пасажыры гэтага рэйса, з борта знялі ад 6 да 8 чалавек. «Зайшоў мужчына ў форме і сказаў: «Я цяпер назаву некаторыя прозвішчы, вы возьмеце свае рэчы і пройдзеце з намі». Назваў 6 чалавек, але па факце гэта 2 сям'і», - распавёў адзін з пасажыраў. З ягоных слоў, папрасілі выйсці дзве пары, усе яны былі прыкладна аднолькавага ўзросту - блізу 50 гадоў. Пры гэтым адна з пар ляцела разам з дзвюма дзяўчынкамі, якім «на выгляд ад 12 да 16 гадоў».

З ягоных слоў, праз некаторы час назвалі яшчэ два прозвішчы, гэтых пасажыраў таксама папрасілі пакінуць борт. «Прайшло яшчэ хвілін 20, як з’явіўся чалавек з закрытым тварам (адзін з іх прыкрыў твар шалікам. - Заўвага. Рэд.). Сказалі ўсім са сваімі рэчамі выйсці, нічога не пакідаць. Мы выйшлі ў аўтобус, але ён нікуды не паехаў, проста зачынілі дзверы, мы стаялі. У гэты час было відаць як па самалёце хадзіў той самы чалавек у масцы і абшукваў яго.

Пры гэтым адзін з пасажыраў заўважыў, што тыя, каго знялі з рэйса, да вылету знаходзіліся разам, гутарылі. «Яны культурна адпачывалі. Ім было весела, трохі шумна, але ўсё ў рамках прыстойнасці», - распавёў пасажыр.

Пасля рэйс прадоўжыў рух без іх. «Пілот абвясціў, што «непаладкі» выпраўленыя, мы паляцім у Мюнхен, але ўжо без знятых людзей».