Даследнікі назвалі магчымых стваральнікаў «Навічка» для Навальнага

РФ не толькі не знішчыла хімічную зброю, але і прадаўжае вырабляць яе для патрэб спецслужбаў.

У Расеі прадаўжаюць распрацоўваць хімічную зброю, нягледзячы на ратыфікацыю Канвенцыі ААН аб яе забароне ў 1997 годзе, вынікае з расследавання груп The Insider і Bellingcat, "Радыё Свабода" і нямецкага выдання Der Spiegel, апублікаванага ў пятніцу, 23 кастрычніка. Са слоў аўтараў, распрацоўкі маглі выкарыстоўвацца ў рэзанансным атручванні расейскага апазіцыянера Аляксея Навальнага, у арганізме якога былі выяўленыя сляды нервова-паралітычнага рэчыва "Навічок".

Важную ролю ў распрацоўках адыгрываюць навуковы цэнтр "Сігнал" у Маскве і дзяржаўны Навукова-даследчы выпрабавальны інстытут вайсковай медыцыны Мінабароны ў Санкт-Пецярбургу, сцвярджаюць даследнікі. У "Сігнале" працуюць спецыялісты ў інгібітарах халінэстэразы, жыццёва важнага ферменту, які ўдзельнічае ў перадачы нервовых імпульсаў. У гэтай жа установе працуюць экспэрты ў нанаінкапсуляцыі - пакаванні часціц рэчыва ў абалонку з іншага рэчыва. Гэтая тэхналогія можа павысіць эфектыўнасць атрутнага рэчыва, замаскаваць яго наяўнасць і адкласці пачатак дзеяння, гаворыцца ў расследаванні.

Цэнтр "Сігнал" некаторы час уваходзіў у склад трэцяга Цэнтральнага навукова-даследчага выпрабавальнага інстытута Мінабароны ў горадзе Шыханах Саратаўскай вобласці. У гэтым жа населеным пункце знаходзіўся філіял Дзяржаўнага навукова-даследчага інстытута арганічнай хіміі і тэхналогіі (ДзяржНДІАХТ), дзе, як мяркуецца, праходзіла распрацоўка рэчыва з групы "Навічок".

Кіраўнік пецярбуржскага ДНДІ меў стасункі з імавернымі атрутнікамі Скрыпалёў

Установы ў Маскве і Санкт-Пецярбургу цесна супрацоўнічаюць, падкрэсліваюць аўтары расследавання. З іх звестак, начальнік пецярбуржскага ДНДІ Сяргей Чэпур неаднаразова тэлефанаваў даследчыкам "Сігналу", а таксама Дзянісу Сяргееву (расеец з пашпартам на імя Сяргея Фядотава) і Аляксандру Мішкіну ("Аляксандру Пятрову"), якіх Вялікая Брытанія абвінаваціла ў атручванні былога двайнога агента Сяргея Скрыпаля ў сакавіку 2018 года. Акрамя таго, Чэпур удзельнічаў у пасяджэнні ў штаб-кватэры Галоўнай управы Генштаба ВС Расеі (былога ГРУ) у лютым 2018 года.

Дырэктар "Сігналу" Артур Жыраў і ягоная каманда запатэнтавалі шэраг біяактыўных дабавак і сумесяў для спартыўных напояў. Словы меркаваных атрутнікаў Скрыпалёў Аляксандра Мішкіна і Анатоля Чапігі ("Аляксандр Пятроў" і "Руслан Башыраў") аб працы ў сферы спартыўнага харчавання ў нашумелым інтэрв'ю Маргарыце Сіманьян з'яўляліся "ўнутрыкарпаратыўным жартам», гаворыцца ў расследаванні.

Узаемадзеянне ГУ Генштаба з распрацоўшчыкамі хімічнай зброі ідзе апасродкавана праз ДНДІ вайсковай медыцыны і Сяргея Чэпура, сцвярджаюць даследнікі ў спасылцы на звесткі білінгу тэлефонных размоў. Пры гэтым "і ў званках кіраўніцтва "Сігналу", і ў званках Чэпура можна знайсці нямала кантактаў і з высокапастаўленымі афіцэрамі ФСБ. Такім чынам, пытанне аб тым, якая з дзвюх сілавых структур адказная за атручванне Навальнага, пакуль застаецца адкрытым", - рэзюмуюць аўтары.

Лабараторыі трох краін ЕЗ і АЗХЗ знайшлі ў аналізах Навальнага сляды "Навічка"

Аляксей Навальны страціў прытомнасць 20 жніўня ў самалёце на шляху з Томска ў Маскву. Пасля экстранай пасадкі ў Омску яго шпіталізавалі, а праз два дні даставілі для лячэння ў берлінскую клініку "Шарытэ".

Экспэрты спецлабараторый узброеных сіл Нямеччыны на просьбу клінікі правялі таксікалагічны аналіз пробаў, узятых у Навальнага, і выявілі ў іх сляды нервова-паралітычнага рэчыва групы "Навічок". Да аналагічных высноў незалежна адна ад адной прыйшлі лабараторыі ў Швэцыі і Францыі, а таксама экспэрты Арганізацыі ў забароне хімічнай зброі (АЗХЗ). Масква адмаўляе ўсе абвінавачванні ў дачыненні да замаху на апазіцыянера. Еўразвяз і Вялікая Брытанія 15 кастрычніка ўвялі санкцыі за атручванне Навальнага.