5 красавiка 2020, Нядзеля, 6:38
Заставайся дома!
Рубрыкі

«З нас проста здзекуюцца!»

19
«З нас проста здзекуюцца!»
ІЛЮСТРАЦЫЙНАЕ ФОТА

У Гомельскай вобласці ўлады за кошт настаўнікаў ствараюць мемарыял.

Улады наважылі стварыць мемарыял на месцы спаленай у 1944 году вёскі Ала (Светлагорскі раён Магілёўскай вобласці). Прапанову падтрымаў Лукашэнка. Аплаціць будаўніцтва «папрасілі» настаўнікаў, паведамляе «Радыё Свабода».

Што за мемарыял?

У 1944 годзе сяло спалілі нацысты. Яны забілі 1758 чалавек, у тым ліку 950 дзяцей. Загінула ў 12 разоў больш людзей, чым у Хатыні. Пасля вайны Ала знікла з мапы Беларусі.

У снежні 2019 года Лукашэнка сустракаўся са студэнтамі-медыкамі. Адна са студэнтак папрасіла кіраўніка падтрымаць прапанову стварэння мемарыяла.

«Неабходна паўдзельнічаць у будаўніцтве ўсім светам», - выказаўся начальнік упраўлення ідэалагічнай працы, культуры і спраў моладзі аблвыканкама Дзяніс Язерскі.

За чый кошт ушануюць памяць?

У Гомельскай вобласці на 22 лютага абвясцілі суботнік. Сродкі пойдуць на будаўніцтва мемарыяла. Работнікаў сферы адукацыі «папрасілі» скінуцца рублём.

Дзяржаўная газета «Гомельская правда» паведаміла: «Усе неабыякавыя жыхары Гомельскай вобласці, якія свята шануюць памяць пра Вялікую Айчынную вайну, возьмуць удзел у абласным суботніку».

У адной з вясковых школ Гомельскай вобласці настаўнікі атрымалі ведамасць з сумамі, якія яны павінны аддаць у фонд суботніка - ад 6 да 68 рублёў з супрацоўніка.

«Гэта проста здзек з нас! У студзені праз разлік заробкаў паводле новых правілаў яна ў нас істотна паменшыліся. Цяпер трэба аддаць па 40-50 рублёў сваіх грошай у фонд суботніка. Ні пра якую добраахвотнасць гаворка не ідзе», - паскардзілася адна з настаўніц. Усяго з гэтай вясковай школы збяруць за адзін дзень 794 рублі.

Настаўнікі паведамілі, што ў школах райцэнтра агульныя сумы дасягнулі 2300 рублёў.

Як стала вядома, грошы збіраюць і з супрацоўнікаў дзіцячых садкоў і школ Гомеля. Адна з выхавальніц гомельскага дзіцячага сада паведаміла, што павінна здаць за суботнік 38 рублёў.

Журналісты таксама атрымалі ад чытачоў загад аднаго з райвыканкамаў рэгіёну з нагоды правядзення ў раёне суботнікаў. Там адзначаецца, што «райвыканкам падтрымаў ініцыятыву прадпрыемстваў і арганізацый раёна аб правядзенні на добраахвотнай аснове суботнікаў». Пачынаючы з сакавіка ў раёне пройдзе пяць суботнікаў.

Што кажа настаўніцкае кіраўніцтва?

«Ад Галоўнага ўпраўлення адукацыі ніякіх падобных загадаў на школы, на раёны не было, - запэўніла намесніца начальніка Галоўнага ўпраўлення адукацыі Гомельскага аблвыканкама Жанна Ждановіч. - Любы такі ўдзел сёння - гэта дабрачынная справа».

На пытанне, што рабіць настаўнікам, калі яны не згаджаюцца з такімі вылічэннямі, чыноўніца сказала, што настаўнікі маюць на гэта поўнае права.

«Гэта тое ж самае, што нам тэлефануюць бацькі і кажуць, што сёння мы павінны здаць тую ці іншую суму на рахунак установы адукацыі. Калі пачынаем высвятляць, высвятляецца, што гаворка ідзе пра дабрачыннасць. А гэта значыць: «я хачу - я магу».