Відэафакт: У Калумбіі 14-гадовая дзяўчынка адбілася ад рабаўнікоў з дапамогай мачэтэ

Трое ўзброеных рабаўнікоў няўдала напалі на сямейную краму.

У калумбійскім горадзе Багаце 14-гадовая дзяўчынка пры дапамозе мачэтэ выгнала з крамы трох рабаўнікоў. Пра гэта 8 лютага паведаміў калумбійскі тэлеканал Caracol Televisión, піша «Гордан».

Канал таксама апублікаваў у YouTube відэа з камер назірання, на якім зафіксаванае гэтае здарэнне. На запісе відаць, як два мужчыны ў матацыклетных шаломах увайшлі ў краму. Следам за імі увайшоў трэці і паспрабаваў зачыніць уваход у будынак, але ў яго не выйшла.

Адзін з мужчын спрабаваў уварвацца за прылавак, дзе сядзела ўладальніца крамы разам з дачкой. 14-гадовая дзяўчынка расказала, што ён наставіў на яе з маці рэвальвер. Пасля гэтага яна схапіла мачэтэ і пачала адбівацца ім ад рабаўніка. Жанчыны здалелі выгнаць усіх зламыснікаў, яны ўцяклі ў невядомым кірунку.

Адзін з нападнікаў паспеў стрэліць і параніў уладальніцу крамы, куля прайшла навылёт і не зачапіла жыццёва важных органаў, адзначае тэлеканал.

Пасля інцыдэнту 14-гадовая дзяўчынка расказала, што гэта ўжо не першы напад на краму, менавіта таму яны захоўвалі халодную зброю ля прылаўка.