Марсі Каптур: Байдэн цалкам падтрымлівае далучэнне Беларусі да ЕЗ

Кангрэсвумэн заявіла, што прэзідэнт ЗША будзе спрыяць еўрапейскай інтэграцыі Беларусі.

Кангрэсвумэн ад Дэмакратычнай партыі Марсі Каптур заявіла, што прэзідэнт ЗША Джо Байдэн будзе спрыяць еўрапейскай інтэграцыі Украіны і Беларусі.

Пра гэта яна заявіла падчас відэаканферэнцыі, арганізаванай Кааліцыяй Цэнтральнай і Усходняй Еўропы.

Паводле ейных слоў, Байдэну не патрэбныя дадатковыя веды з нагоды таго, што павінна быць зроблена ў Цэнтральнай Еўропе, як адказ ЗША на падзеі ў Беларусі.

Ён цалкам падтрымлівае ўмацаванне трансатлантычнай супольнасці і далучэння такіх краін як Украіна і Беларусь да Еўразвязу. Такія ж мэты і ў мяне», - цытуе словы кангрэсвумэн ад штата Агаё «Голас Амерыкі».

Рэагуючы на сітуацыю ў Беларусі, Марсі Каптур заявіла, што ўстурбаваная паводзінамі дыктатара Аляксандра Лукашэнкі і спадзяецца на пашырэнне амерыканскіх санкцый у дачыненні да беларусаў і расейцаў, якія маюць дачыненне да парушэння правоў чалавека ў Беларусі.

«Замест таго, каб адрэагаваць на заклікі да большай свабоды, Лукашэнка звярнуўся да расейскага дыктатара Уладзіміру Пуціна, каб атрымаць ад яго гарантыі ў крэдытах, і дапамогу ад іх прапагандыстаў і спецслужбаў», - заявіла Каптур.

Яна дадала, што ЗША павінны пашырыць санкцыі ў дачыненні да тых, хто займаецца ў Беларусі злачыннай дзейнасцю, у дачыненні да супрацоўнікаў спецслужбаў і МУС, а таксама ў дачыненні да расейцаў, якія маюць дачыненне да падзей у суседняй краіне.

Джо Байдэн паабяцаў прыцягнуць Расею да адказнасці за яе агрэсію супраць Украіны. Акрамя таго, яшчэ да свайго прэзідэнцтва ён заклікаў пашырыць санкцыі супраць рэжыму Лукашэнкі.