Ідыятызм лукашыстаў: чытанне кніг у электрычцы трэба ўзгадняць

Чытанне кніг могуць прыраўняць да акцыі пратэсту.

Карыстачы ініцыятывы skarga.help адправілі зварот з нагоды затрымання пенсіянераў, якія чыталі кнігі беларускіх пісьменнікаў у электрычцы. Вось што адказалі ўлады, піша tut.by.

Нагадаем, у канцы лютага ў Менску затрымалі пенсіянераў, пасажыраў электрычкі, якая ехала ў накірунку Маладзечна. Ім выставілі абвінавачанне ва ўдзеле ў несанкцыянаванай акцыі: паджылыя людзі чыталі ў цягніку кнігі беларускіх пісьменнікаў, паводле некаторых звестак, у кагосьці ў руках былі і бел-чырвона-белыя сцяжкі. Як распавядалі затрыманыя, у вагоне знаходзілася амаль 30 паджылых людзей. Пасля затрымання пенсіянераў адвезлі на Акрэсціна.

Некалькі тыдняў таму карыстальнікі ініцыятывы skarga.help адправілі зварот мясцовым уладам наконт гэтай сітуацыі.

Адміністрацыя Маскоўскага раёна адказала: «Чытанне кніг беларускіх пісьменнікаў заканадаўствам не абмежаванае.

Разам з тым, калі чытанне кніг мае прыкметы, якія належаць да закона «Аб масавых мерапрыемствах», то правядзенне такога чытання трэба ўзгадніць у адпаведнасці з законам».

Як распазнаць гэтыя прыкметы, у адказе не паведамляецца.