У Віцебску шасцікласнікі байкатавалі «прысвячэнне» ў піянеры

У гімназіі разгарэўся канфлікт.

У гімназіі № 8 Віцебска дзецям прапанавалі стаць піянерамі. Некалькі шасцікласнікаў не захацелі ўступіць у арганізацыю, і гэта выклікала ў класнай кіраўніцы абурэнне. «Пасля размовы з настаўніцай дзеці плакалі і ў іх трэсліся рукі», – паскардзіўся бацька аднаго з вучняў.

Канфлікт закрануў дзевяць вучняў, расказаў чытач rebenok.by.

– Некалькі дзён таму дзіця прынесла бланк заявы, які я павінен быў запоўніць і падпісаць. Мне як законнаму прадстаўніку прапаноўвалі пацвердзіць, што я не пярэчу супраць уступлення сына ў арганізацыю. Дык я і не пярэчу, таму спытаў у дзіцяці, ці хоча ён сам паспрабаваць. Пачуў: «Давай лепш у наступным годзе». Пастанавілі і забыліся.

На наступны дзень хлопчык патэлефанаваў у слязах. З блытанага аповеду бацька зразумеў, што дзіця аблаялі з прычыны «няправільнага» адказу ў заяве.

– Сын рэальна заікаўся, хоць у цэлым ён даволі ўраўнаважаны, – дзеліцца суразмоўца. – Растлумачыў, што «класная» вельмі раззлавалася на тых, хто не захацеў уступаць у піянеры, абяцала пазбавіць граматаў, узнагародаў і нават выключыць са школы.

Дома хлопчык гісторыю дапоўніў: для «адмоўнікаў» настаўніца правяла асобны сход. На падвышаных тонах дзецям казалі пра іх бацькоў, дакладней пра тое, хто з іх якую пасаду займае і як адмова ад піянерыі ўдарыць па іх рэпутацыі.

Увечары ў бацькоўскім чаце завязалася ліставанне. Высветлілася, што ў слязах дадому вярнулася не адно дзіця. Бацькі дзяліліся новымі падрабязнасцямі. Адна дзяўчынка, напрыклад, умольвала маму прывезці заяву "проста цяпер", інакш тую звольняць з працы, а вінаватая будзе дачка.

Інцыдэнт адбыўся ў мінулую пятніцу. У панядзелак бацькі сабраліся ў школе – чакалі тлумачэнняў ад настаўніцы. Паводле словаў чытача, педагог выглядала засмучанай, выбачылася, сказала, што здымае з сябе класнае кіраўніцтва, і выйшла. Бацькі выказалі здагадку, што яна выступала за ўступленне ў піянеры з падачы дырэктара, і накіраваліся ў адміністрацыю.

– Вынік нашай гутаркі з дырэктарам коратка такі: дзецям праз неўступленне ў піянеры нічога не пагражае; сітуацыю яны перабольшылі, а мы, дарослыя, пайшлі за іх эмоцыямі і давялі педагога, – кажа мужчына. – Цяпер настаўніца ў слязах, мы павінны папрасіць прабачэння.

Бацька шасцікласніка перакананы: ягоны сын нічога не перабольшыў, як і іншыя дзеці. Мужчына не разумее, навошта было ствараць такую сітуацыю ў прынцыпе.

– Я не звязваю піянерскую арганізацыю з палітыкай. Калі б я чуў з боку школы просьбы з нагоды ўступлення ў шэрагі піянераў, калі б мне расказалі, што ад сяброўства ў арганізацыі залежаць якія-небудзь паказнікі, скажам, у выхаваўчай працы, то я падпісаў бы гэтую заяву. Але са мной ніхто не размаўляў. Затое размаўлялі з дзецьмі. Ды так «пісьменна», што ў галаве не ўкладваецца.

Мы датэлефанаваліся да дырэктаркі гімназіі Раісы Грабоўскай. Яна мяркуе, што бакі канфлікту дарма паддаліся эмоцыям, а бацькі няправільна інтэрпрэтавалі сутнасць заяваў, прапанаваных на подпіс.

– Раней з акцыямі накшталт «Цімур і ягоная каманда» ў нас не было ніякіх праблемаў. Праходзіла свята і ўсё. А сёлета на ўступленне ў піянеры неабходна браць заяву ў бацькоў. Мы раздалі ім узоры ўпершыню. Там трохі настаўніца няслушна патлумачыла [сітуацыю]. Бацькі ж тады, калi пачулі, што гаворка ідзе пра грамадскую арганізацыі, адразу сталі калючымі, як вожыкі. Пытаюцца: «Навошта нам нейкія арганізацыі?» Але гэта ж не палітычная арганізацыя. Школа па-за палітыкай. Што такое для дзіцяці быць піянерам? Гэта значыць стаць першым у добрых справах, дапамозе класу, зборы макулатуры.

Удакладняем, што нашы чытачы былі абураныя іншым: тонам, якім педагог гутарыла з дзецьмі. Дырэктарка адказвае, што тут не ўсё так адназначна.

– Бацькі на эмоцыях. Кажуць мне: «Дзіця расказала...» А ў тым, што дзіця магло нешта не так зразумець, ніхто не разбіраецца. Бацькі самі давялі настаўніцу да слёзаў, гэта недапушчальна. Прыйшоў бацька, які стукае кулаком па стале, настаўніца такога нават не чакала.

Раіса Грабоўская запэўніла, што ніякіх негатыўных наступстваў для дзяцей, якія не ўступілі ў піянеры, не будзе.

Да дзяцей як ставіліся, так і ставяцца. Я сёння сустрэлася з усімі бацькамі, усё патлумачыла. Канфлікт вычарпаны. Класная кіраўніца застаецца па-ранейшаму замацаваная за гэтым класам.

Напамін настаўнікам: настойваць на ўступленні ў піянеры – неабавязкова

Цяперашні інцыдэнт у Віцебску – не адзінкавы. З пачатку навучальнага года чытачы не раз паведамлялі нам пра сітуацыі, калі педагогі хваравіта ўспрымалі нежаданне дзяцей далучыцца да якога-небудзь грамадскага руху. Цікава, што самі прадстаўнікі грамадскіх аб'яднанняў катэгарычнасць настаўнікаў не падзяляюць.

Раней старшыня грамадскага аб'яднання «Беларуская рэспубліканская піянерская арганізацыя» Аляксандра Ганчарова тлумачыла:

– Прымусіць уступіць у грамадскае аб'яднанне нікога не могуць – гэта забаронена. Пісьмовы дазвол аднаго з бацькоў павінна быць абавязкова. Нават калі бацька напіша на гэтай заяве слова «пярэчу», гэта апрыёры з'яўляецца нязгодай.

Паводле словаў Аляксандры, дазвол бацькоў павінен быць аформлены пісьмова. І пацвярджаць згоду давядзецца не аднойчы.

– З 7 да 10 гадоў – у нас гэта акцябраты, з 10 да 14 – піянеры, а з 14 гадоў і старэйшыя – піянеры-лідары. І кожны раз трэба пісаць заяву: спачатку ў акцябраты, потым у піянеры і гэтак далей. Аўтаматычна мы нікога ў свае шэрагі не прымаем. Паводле такой самай заявы дзіця пазбавяць статусу піянера.