«Відавочна, у Нацбанку раскрылі астатні канверт Пракаповіча»

Навіны з эканамічнага фронту прыходзяць вясёлыя.

Тэлеграм-канал «Нік і Майк» апублікаваў агляд галоўных эканамічных навін Беларусі:

1. Маштаб скарачэнняў на беларускіх прадпрыемствах і ва ўстановах. Уразіў. Грошай няма зусім і па ўсёй краіне.

2. Саўмін увёў забарону на вываз пшаніцы, жыта, ячменю, аўса, кукурузы, грэчкі і іншых круп. Чакаем класіку ад родапачынальніка жанру палітычнага стэнд-апу: «Узяўся за яйцы - зніклі малако».

3. МАРГ кантралюе цэны на 55% тавараў у надзеі спыніць інфляцыю. Дзіўна, але інфляцыя спыняцца не жадае. Але напраўду і не павінна была. Проста хтосьці дрэнна вучыўся ва ўніверсітэце і прапускаў важныя пары.

4. На таргах упершыню за некалькі месяцаў аб'ём таргоў перавысіў 100 млн даляраў. Да гэтага на працягу месяца яны былі не вышэйшыя за 20 млн. Нацбанк можа колькі хочаш рабіць выгляд, што ўсё добра, але эканоміку падмануць яшчэ нікому не ўдавалася. А тое, што падмануць яе спрабуюць, прызнаўся сёння Калавур.

Але яшчэ цікавей тое, што кіраўнік Нацбанка распавёў пра сваю стратэгію інвеставання і тое, што захоўвае грошы ў беларускіх рублях. Заява адважная, таму яе разбяром асобна. Тут ёсць два аспекты.

Першы. Рэжым пачынае секчы дровы залатымі сякерамі. У прапагандысцкую печ кінуты нават кіраўнік Нацбанка. Яго суседства з экспэрткай БІСІ грамадзянкай Рэчыц, якая надоечы ў аналізе абвінаваціла беларускія незалежныя даследчыя цэнтры ў жаданні «ўвесці грамадства ў дэпрэсіўны стан і тым самым мінімізаваць шансы эканамічнага развіцця пад кіраўніцтвам дзейнай улады», выглядае камічна. Але імідж - нішто, смага - усё. Відавочна, у Нацбанку раскрылі астатні канверт Пракаповіча.

Другі. Калавур прызнаўся ў інсайдэрскім гандлі. Вядома, каму, як не кіраўніку Нацбанка ведаць пра ўсе чаканыя рухі беларускага рубля ў дачыненні да даляра і еўра, а таксама пра планаваную дэвальвацыю.

Тут нават дзіўна, што прыбытковасць ашчадку Калавура ўсяго толькі на 70% вышэйшая за валютныя ўклады. Бо менавіта кіраўнік Нацбанка прымае ўсе (добра, амаль усе) пастановы што да грашова-крэдытнай палітыкі краіны.

Можна і падыграць сабе: калі трэба, прытрымаць курс (пакуль грошы на рублёвым дэпазіце), а як тэрмін дэпазіту скончыўся - зняць рублі з дэпазіту, зайсці ў абменнік, які ёсць проста ў будынку самога Нацбанка, памяняць на даляры ці еўра, вярнуцца ў свой кабінет і аслабіць курс.

Увечары таго ж дня зноў пайсці абмяняць ужо паводле новага курсу і зноў пакласці на дэпазіт у рублях. І ўжо, вядома, Калавур наўрад ці перажывае з нагоды нечаканай рэзкай дэвальвацыі беларускага рубля - ён неяк сам сябе папярэдзіць, калі што.

Дарэчы, гэта фактычна інсайдэрская дзейнасць. Да ведама: інсайдэр - гэта кожны чалавек, які мае доступ да закрытай інфармацыі (напрыклад, службовай або камерцыйнай таямніцы). У развітых краінах за такое могуць і ў турму пасадзіць, не кажучы ўжо пра грамадскі скандал і страту пасады.

Ад сябе можам дадаць, што не рэкамендуем паўтараць штуку Калавура ў хатніх умовах. Небяспечна для вас і вашых грашовых сродкаў. Паколькі фармальна прыбытковасць вышэйшая, а ў пераліку на валюту атрымліваецца мінус. Такая вось займальная матэматыка.

Цяпер самае галоўнае пытанне: калі заканчваюцца 13 месяцаў безадклікальнага ўкладу, пра які заявіў Калавур? Можа, ужо?