У РФ асудзілі трох футбалістаў з Афрыкі, якія прыляталі ў Беларусь на зборы

З Беларусі яны на таксі паехалі ў Пскоўскую вобласць.

У Расеі судзілі трох футбалістаў з Афрыкі, якія прыляцелі з камандай у Беларусь на зборы, а апынуліся ў Пскоўскай вобласці без дакументаў, паведамляе тэлеграм-канал Baza.

У лютым сёлета грамадзяне Сенегала і Гвінеі Ба Муса, Бары Мамаду Муса і Дыяла Шэйх Умар прыляцелі ў Беларусь на зборы з адным з мясцовых клубаў. Праз пару тыдняў яны дамовіліся з таксістам і паехалі ў Расею.

25 лютага Ба, Бары і Дыяла спешыліся ў раёне пскоўскай вёскі Лабок і паспрабавалі ўздоўж чыгункі прабрацца ў Расею. Там іх і затрымалі расейскія памежнікі. Дакументаў у іх пры сабе не было. Пашпарты яны пакінулі ў кіраўніцтве беларускага клуба.

У выніку Невельскі раённы суд Пскоўскай вобласці прысудзіў кожнага з траіх да васьмі месяцаў папраўчай калоніі.

Нагадаем, у снежні летась у беларускіх СМІ паведамлялася пра семярых афрыканскіх футбалістаў, якія амаль тыдзень жылі ў Нацыянальным аэрапорце Менск. Сярод іх былі, у тым ліку, грамадзяне Сенегала. Яны ўвесь час знаходзіліся ў будынку аэравакзала, спалі на крэслах, з журналістамі мець зносіны адмаўляліся. На ўсе роспыты яны адказвалі, што праз форс-мажор ім давялося памяняць квіткі і яны чакалі свайго рэйса.

Падобная гісторыя адбылася і ў Маларыце, куды прыехаў на зборы футбольны клуб з Нігерыі. 7 траўня пасля трэніроўкі адзін спартовец не вярнуўся ў гатэль. Амаль праз два тыдні яго затрымалі польскія памежнікі каля Тэрэспаля.