«Дэпутатку» з Гомеля прызналі датычнай да агрэсіі супраць Украіны

Лукашыстку ўнеслі ва ўкраінскую базу «Міратворац».

Беларуская «дэпутатка» з Гомеля Ірына Даўгала занесеная ва ўкраінскую базу «Міратворац». Яна прызнаная датычнай да антыўкраінскай прапаганды і ўдзелу ў актах гуманітарнай агрэсіі супраць Украіны, паведаміў «Флагшток».

Ірына Даўгала сваю кар'еру пачала з Цэнтральнага райкама Камуністычнага саюза моладзі горада Гомеля, доўгі час працавала ў камісіях у справах непаўналетніх Цэнтральнага раёна і Гомельскага гарвыканкама, займала пасаду галоўнага ідэолага Гомельскай вобласці.

Даўгала добра вядомая актывістам са стажам. Па абавязку службы ёй даводзілася публічна ўмешвацца ў гарадскія канфлікты для іх урэгулявання. Напрыклад, у 2017 годзе яна развязала скандал, звязаны са спробай ліквідацыі чыноўнікамі філіяла Веткаўскага музея ў Гомелі. У тым жа годзе апраўдвалася перад паслом Ізраіля наконт будаўніцтва на месцы старых габрэйскіх могілак у Гомелі шматпавярховага дома.

У 2018 годзе з падатковай дэкларацыі тады яшчэ кандыдата ў дэпутаты парламента Ірыны Даўгалы стаў вядомы яе заробак ідэолага 3 600 рублёў. Такая інфармацыя абурыла многіх беларусаў. Але Даўгала патлумачыла, што такі паводле беларускіх мерках высокі заробак яна заслужыла.

«Заробак такім стаў у мяне далёка не раптоўна. З улікам таго, што ў мяне амаль 30 гадоў стажу дзяржаўнай службы - гэта суразмерны заробак».

Пасля выбараў у 2020 годзе ў Гомелі сфармавалася ініцыятыва па адклiканню «дэпутаткі» Даўгалы. Але ўсе намаганні актывістаў пазбавіць яе дэпутацкіх паўнамоцтваў сталіся беспаспяховымі.

Дэпутатка мае свой тэлеграм-канал «Ірына Даўгала. За годнае жыццё!», у якім яна выказвае свае думкі з нагоды таго, што адбываецца ў краіне. Мабыць, менавіта за антыўкраінскія выказванні ў сваім тэлеграме «дэпутатку» і ўнеслі ў базу «Міратворац».