У ДАІ ў Ждановічах - зноў вялізныя чэргі

Сістэма электроннай рэгістрацыі наведвальнікаў выведзеная з ладу.

«У МРА ў Ждановічах не працуе электронная чарга, усе стаяць у жывой на пастаноўку на ўлік, - напісаў у рэдакцыю onliner.by мянчук. - У чарзе пайшла інфармацыя, што база не працуе, потым казалі, што і база вобласці таксама».

Onliner пераканаўся, што ў чарзе сапраўды распаўсюджваюцца такія чуткі, аднак дакументы ўсё ж прымаюць.

Загружанымі днямі ў сталічных МРА ўважаюцца першы і апошні працоўныя дні - аўторак і субота. Але сёння, у сераду, у будынку на вул. Ціміразева зноў небывалы ажыятаж. Чэргі выходзяць за межы памяшкання рэгістрацыйнага аддзела, «хвост» віднеецца сярод гандлёвых павільёнаў ГЦ «Град».

Можна назіраць дзве чаргі для падачы дакументаў: у Менск і ў вобласць. Агулам у памяшканні знаходзіцца блізу паўтысячы чалавек. Апоўдні былі адкрытыя два акенцы з кожных трох. Прыём дакументаў не быў пастаўлены на паўзу, іх прымалі.

Пры гэтым аб'явы на акенцах папярэджваюць аб павелічэнні тэрміну вырабу дакументаў да 10 дзён. Тлумачаць гэта прафілактычнымі работамі з ВА.

Прычына блытаніны - у непрацуючай сістэме электроннай чаргі. Замест чакання на лаўках у суседняй зале людзі вымушаныя ў даслоўным сэнсе стаяць у чарзе ўнутры памяшкання МРА.

Мужчына, які скончыў увесь ланцужок дзеянняў па падачы дакументаў, заўважыў, што выдаткаваў на працэс 3,5 гадзіны. Падкрэсліў, што яму пашанцавала: удалося выбрацца ў будны дзень з самай раніцы. А раніцай, мяркуючы па фота, якія прыйшлі ў рэдакцыю, сітуацыя была яшчэ горшай, чым апоўдні. Менавіта тады і сталі распаўсюджвацца чуткі аб няспраўнай базе. Гэтаму спрыяла і аб'ява «З тэхнічных прычын МРА ДАІ Менска адміністрацыйныя працэдуры не ажыццяўляе».

Нагадаем, што ў канцы ліпеня кіберпартызаны правялі самую маштабную кібератаку на рэжым. Тады ў Беларусі былі ўзламаныя базы ДАІ.