Палітычную зняволеную Настассю Кухту прысудзілі да пяці гадоў калоніі

Прысуд вынесла суддзя Валянціна Зянкевіч.

Менскі гарадскі суд разгледзеў справу палітычнай зняволенай актывісткі з Менска Настассі Кухты. Суддзя Валянціна Зянкевіч абвясціла прысуд: пяць гадоў пазбаўлення волі ў калоніі агульнага рэжыму, паведамляе праваабарончы цэнтр «Вясна».

Справа разглядалася больш за месяц - з 10 кастрычніка.

Актывістку прызналі вінаватай паводле трох артыкулаў Крымінальнага кодэкса: арт.342 ("Актыўны ўдзел у дзеяннях, якія груба парушаюць грамадскі парадак"); ч.3 арт.361 («Заклікі да захадаў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы Рэспублікі Беларусь»); ч.1 арт.361-1 ("Стварэнне экстрэмісцкага фармавання або ўдзел у ім").

За кратамі дзяўчына ўтрымліваецца больш за сем месяцаў. Насту Кухту затрымалі 17 лютага і спачатку асудзілі на 15 дзён за «дробнае хуліганства».

Падтрымаць актывістку лістамі салідарнасці, пасылкамі і грашовымі пераводамі можна на адрасе: Следчы ізалятар-1, 220030, Менск, вул.Валадарскага, 2. Настасся Кухта.