Зяленскі абмеркаваў з кіраўніком Еўракамісіі энэргетычную стабільнасць Украіны
4- 25.11.2022, 21:54
- 2,552
Фон дэр Ляен паведаміла, што ЕЗ перадасць трансфарматары і генератары.
Прэзідэнт Украіны Уладзімір Зяленскі 25 лістапада правёў тэлефонную размову з кіраўніцай Еўрапейскай камісіі Урсулай фон дэр Ляен.
Пра гэта Зяленскі паведаміў у Twitter.
«Абмеркавалі ініцыятыву Grain From Ukraine з Урсулай фон дэр Ляен. Падзякаваў за вялікую фінансавую дапамогу ЕСЗ, за распачатую работу над дзявятым пакетам санкцый [супраць Расеі]. Адзначана, што абмежаванне цаны расейскай нафты мае быць эфектыўным. Таксама абмяркоўвалася супрацоўніцтва ў забеспячэнні энэргетычнай стабільнасці Украіны», - напісаў прэзідэнт.
Discussed the #GrainfromUkraine initiative with @vonderleyen. Thanked for the huge 🇪🇺 financial assistance, for work started on the 9th sanctions package. Noted that the price cap for Russian oil should be effective. Cooperation on ensuring 🇺🇦 energy stability was also discussed.
— Володимир Зеленський (@ZelenskyyUa) November 25, 2022
Фон дэр Ляен выказала Зелянскаму поўную салідарнасць ЕЗ з Украінай, якая пакутуе ад наўмысных і варварскіх бамбаванняў прэзідэнтам РФ Уладзімірам Пуціным цывільнай інфраструктуры краіны, адзначаецца на сайце Еўракамісіі.
«Я цвёрда асуджаю гэтыя напады. Расея мае быць прыцягнутая да адказнасці за ваенныя злачынствы», - заявіла фон дэр Ляен.
Паводле ейных слоў, ЕЗ актывізуе намаганні з партнёрамі для пільнай падтрымкі Украіне для аднаўлення і падтрымання электра- і цеплазабеспячэння для цывільнага насельніцтва.
Адзначаецца, што ЕЗ перадасць Украіне 200 сярэдніх трансфарматараў і вялікі аўтатрансфарматар з Літвы, аўтатрансфарматар сярэдніх памераў з Латвіі, а таксама 40 цяжкіх генератараў з рэзэрвы, размешчанай у Румыніі.
"Кожны з гэтых генератараў можа забяспечыць бесперапыннае сілкаванне шпіталю малога і сярэдняга памеру... Мы таксама звярнуліся да адпаведных кампаній у розных краінах, каб запытаць жыццёва важнае высакавольтнае абсталяванне, у тым ліку дадатковыя аўтатрансфарматары, і каардынуем з партнёрамі яго хуткую дастаўку ў Украіну" , - падсумавала кіраўніца Еўракамісіі.
