Навукоўцы высветлілі, як можна стаць мацнейшым усяго за тры секунды трэніровак у дзень.

За тры секунды практыкаванняў у дзень можна значна павялічыць цягліцавую сілу рук.

Рэгулярна выконваючы нескладаны комплекс фізічных практыкаванняў усяго па тры секунды ў дзень, можна значна павялічыць цягліцавую сілу рук - упэўненыя японскія даследнікі.

Неверагодна, але ўніверсітэцкім навукоўцам з буйнога партовага горада Ніігаты (Японія) удалося эксперыментальным шляхам давесці, што ўсяго за тры секунды (!) трэніровак у дзень можна ўмацаваць здароўе і стаць значна мацнейшым. Пра ход даследавання і яго вынікі яны распавялі ў артыкуле, апублікаваным у Scandinavian Journal of Medicine and Science in Sports.

У эксперыменце ўзялі ўдзел 49 студэнтаў-добраахвотнікаў, якія асноўную частку часу праводзілі ў статычным становішчы, седзячы на лекцыях ці ў бібліятэках. Іх адвольна падзялілі на чатыры групы: тры з іх былі трэніровачнымі, у якія ўваходзілі па 13 студэнтаў, астатнія дзесяць добраахвотнікаў склалі кантрольную групу.

На працягу 20 дзён студэнты з трох груп выконвалі пэўны комплекс фізічных практыкаванняў з гантэлямі, выдаткоўваючы на трэніроўкі штодня па тры секунды. Кожная група выкарыстоўвала толькі адзін з сілавых элементаў для ўмацавання і развіцця двухгаловых цягліц пляча - біцэпсаў.

Падыспытныя карысталіся трыма практыкаваннямі - ізаметрычным, канцэнтрычным і эксцэнтрычным. Кантрольная група ў трэніроўках не ўдзельнічала.

Выконваючы ізаметрычнае практыкаванне, чалавек трымае гантэль паралельна падлозе, знаходзячыся ў нерухомым стане. Канцэнтрычны элемент суправаджаецца максімальнай напругай цягліц падчас згінання локцевага сустава, а эксцэнтрычны - пры яго выпростванні.

Паводле вынікаў даследавання высветлілася, што ў адрозненні ад кантрольнай групы, трэніраваныя студэнты павялічылі сваю мускульную сілу. Найбольшы эфект быў дасягнуты ў групе, якая займалася эксцэнтрычнымі практыкаваннямі: за 60 секунд трэніровак на працягу 20 дзён чальцы гэтай каманды добраахвотнікаў сталі мацнейшымі на 11,5 працэнта.