Дзяржсакратары Савета бяспекі Беларусі і РФ правялі перамовы ў Маскве
23- 16.08.2022, 20:03
- 9,366
Вальфовіч і Патрушаў расказалі адзін аднаму пра «гібрыдную вайну Захаду супраць РФ і Беларусі».
Дзяржсакратары Савета бяспекі РФ і РБ Мікалай Патрушаў і Аляксандр Вальфовіч на перамовах у Маскве абмеркавалі пытанні гарантавання бяспекі.
Пра гэта паведамляе прэс-служба расейскага Савета бяспекі.
«Абмеркаваны ключавыя пытанні гарантавання бяспекі ва ўмовах агрэсіўнай палітыкі NATO і развязанай краінамі Захаду гібрыднай вайны супраць Расеі і Беларусі», — гаворыцца ў паведамленні.
Таксама быў разгледжаны «шэраг прыярытэтных тэм супрацоўніцтва Расеі і Беларусі ў рамках АДКБ і іншых міжнародных арганізацый, а таксама абмеркавалі перспектывы паўнапраўнага членства Беларусі ў Шанхайскай арганізацыі супрацоўніцтва».
«Суразмоўцы абмяняліся меркаваннямі аб сітуацыі ва Украіне. Падкрэслена, што наўмысныя правакацыі кіеўскіх уладаў пры відавочным папушчальніцтве Захаду ў дачыненні да атамных аб'ектаў нясуць істотную пагрозу еўрапейскай і глабальнай ядзернай і радыяцыйнай бяспекі», - паведамілі ў прэс-службе.