Украінскія беспілотнікі SkyKnight дапусцілі для выкарыстання ў войсках

Дроны абсталяваныя штучным інтэлектам.

Мінабароны Украіны дапусціла айчынныя беспілотнікі SkyKnight (Нябесны рыцар) да эксплуатацыі ў войсках, паведамляе nv.ua.

"Штучны інтэлект, максімальны карысны цяжар 2,5 кг і аўтаматычны рэжым палёту", — так апісвае новы БЛА прэсавая служба Мінабароны.

Там адзначаюць, што SkyKnight 2 даволі хуткі, магутны і адначасова ціхі, а таксама просты ў кіраванні.

"Калі аператар ужо мае ўменне пілатавання на DJI, Autel, на стабілізаваных платформах, то SkyKnight 2 ён асвоіць вельмі хутка, прыблізна – за тыдзень", – кажуць у Мінабароны.

Пры гэтым калі аператар вызначыць цэль, якую трэба патрапіць, гэты беспілотнік будзе ляцець да яе ў аўтаматычным рэжыме, бо ім будзе кіраваць бартавы кампутар.

"Нават праз страту сувязі з прычыны глушэння варожымі сродкамі РЭБ, гэты робат усё роўна даляціць да вызначанай аператарам цэлі", – адзначаюць вайскоўцы.

Кампанія-вытворца дрона SkyKnight 2 падала сваю распрацоўку ў Мінабароны, калі пачалася паскораная працэдура рэгістрацыі допуску да эксплуатацыі.