Вялікая паводка накрыла Грэцыю

Двое загінулых, ёсць зніклыя без вестак.

У цэнтральнай частцы Грэцыі сама меней два чалавекі загінулі і трое зніклі без вестак пасля таго, як моцныя ліўні выклікалі паводку.

Пра гэта паведамляе Kathimerini.

Шторм Даніэль, які шалее ў Грэцыі з панядзелка, выклікаў апоўзні, разбурыў мост і паваліў апоры ліній электраперадачаў.

У аўторак адзін чалавек загінуў пасля абвалу сцяны ў выніку непагадзі ў партовым горадзе Волас.

Таксама цела пажылой жанчыны было знойдзенае непадалёку ад населенага пункта Пеліён у цэнтральнай Грэцыі. Яе знайшлі пад кучай дроваў.

Акрамя таго, прадаўжаецца выратавальная аперацыя ў пошуку трох зніклых без вестак.

У Грэцыі заявілі, што гэтая непагадзь стала самай экстрэмальнай з гледзішча колькасці ападкаў за ўсю гісторыю назіранняў у краіне.