Журналістка адсудзіла ў Трампа 83 мільёны даляраў

Гэта самая буйная судовая параза экс-прэзідэнта ЗША.

Экс-прэзідэнт ЗША Дональд Трамп прайграў грамадзянскі судовы пазоў ад журналісткі Джын Кэрал. Суд абавязаў экс-прэзідэнта заплаціць ёй 83 мільёны даляраў кампенсацыі за яго зневажальныя і паклёпніцкія заявы ў яе адрас, паведамляе CNN.

У 2019 годзе Кэрал апублікавала кнігу, у якой гаварылася, што Трамп нібыта згвалтаваў яе ў прымерачнай універмагу ў цэнтры Нью-Ёрка ў 1996 годзе. Ніякіх фактычных довадаў яна не мае, а сам Трамп адмаўляў яе абвінавачанні. Пры гэтым ён выкарыстоўваў абразлівыя фармулёўкі, між іншым называў яе «псіхічна хворай».

У траўні мінулага года асобнае федэральнае журы Манхэтэна прызнала, што Трамп дамагаўся Кэрал, але прысяжныя не знайшлі дастатковых доказаў факту згвалтавання. Акрамя таго, журы прысудзіла выплаціць журналістцы 5 млн даляраў у якасці кампенсацыі за паклёпніцкія публічныя заявы экс-прэзідэнта, зробленыя ім у 2022 годзе, калі ён прыніжаў яе і адмаўляў абвінавачанні.

Новая пастанова, прынятая ў пятніцу, прызнае Трампа вінаватым у паклёпніцкіх і зневажальных выказваннях на адрас журналісткі, сказаных публічна ў 2019 годзе. Пастановай суда пацярпелы бок атрымае ад Трампа 11 млн на фінансаванне кампаніі па аднаўленні сваёй рэпутацыі і яшчэ 7,3 млн – кампенсацыі за эмацыйную шкоду. Астатнюю суму – 65 мільёнаў даляраў – экс-прэзідэнт павінен заплаціць у якасці штрафу за свае зламысныя дзеянні ў дачыненні да Кэрал.

Журналістка вітала пятніцкую пастанову, заявіўшы, што гэта «вялікая параза для кожнага хулігана, які спрабуе прынізіць жанчыну». Трамп не прысутнічаў на зачытванні прысуду, а пазней напісаў у сацыяльных сетках, што лічыць прысуд «абсалютна бессэнсоўным».

CNN адзначае, што прызначаная судом сума з'яўляецца «ашаламляльнай» і гэты прысуд зʼяўляецца «самай сурʼёзнай судовай няўдачай» для Трампа.